ՔՊ-ն «խփեց» ՀՀԿ-ի ռեկորդը

Վերլուծական 28 Մարտ, 2020 20:00

Չնայած երկրում սահմանված արտակարգ դրությանը, իրավիճակին, երբ հասարակ քաղաքացիները, հարկադիր պարապուրդի մատնված լինելով, փորձում են հոգալ ամենօրյա ծախսերը՝ Ազգային ժողովը շարունակում է ամեն ամիս շռայլորեն պարգևատրել ԱԺ պատգամավորներին ու աշխատակիցներին։ Մամուլում երեկ տարածվեց պաշտոնական տեղեկություն, համաձայն որի՝ ՀՀ ԱԺ նախագահ Արարատ Միրզոյանի՝ 03․03․2020թ․ Կ-38-Ա կարգադրությամբ հատկացված պագևատրումների ընդհանուր չափը կազմել է 61․149․110 ՀՀ դրամ, որը համարժեք է շուրջ 125.000 ԱՄՆ դոլարին։ 2020թ․ փետրվար ամսին ՀՀ Ազգային ժողովում 2 անգամ պարգևավճարներ էին բաժանվել։ Պարգևավճարները հատկացվել էին որպես խրախուսանք հունվար ամսվա 17 աշխատանքային օրերի ընթացքում Ազգային ժողովի պատգամավորների և աշխատակիցների կատարած աշխատանքի համար, որոնք պարգևատրվել էին 173.777.983 ՀՀ դրամի չափով, որը համարժեք է շուրջ 362.000 դոլարին։ Այսպիսով, հունվարի 17 աշխատանքային օրերին և փետրվարին կատարած աշխատանքների համար Ազգային ժողովի պատգամավորներն ու աշխատակիցները պարգևատրվել են 235 միլիոն դրամի կամ 495 հազար ԱՄՆ դոլարի չափով։ Դեռ հայտնի չէ, թե որ պատգամավորները և որքան գումար կփոխանցեն կորոնավիրուսի դեմ պայքարի համար բացված հաշվեհամարին: Փաստացի, պարգևավճարները փոխանցելու որոշումը միասնական չէր, այն թողվել է պատգամավորների հայեցողությանը և բարի կամքին:

Ինչպես գիտենք, հունվարից ԱԺ-ում մեկնարկել է չորրորդ նստաշրջանը, որը ձգվելու է մինչև հունիս: Ինչո՞վ են աչքի ընկել այս ընթացքում հայրենի երեսփոխանները, որ իրենք իրենց արժանացրել են նման բարձր պարգևի: Օրինակ՝ Իմ Քայլի պատգամավոր Վարդան Աթաբեկյանն ունեցել է զրո ելույթ և տվել է զրո հարց, բացակայել է 42 անգամ: Մաթևոս Ասատրյանը, ով նույնպես Իմ Քայլից է, տվել է 1 հարց, ունեցել է 0 ելույթ, բացակայել է 51 անգամ: Իմ Քայլից Ռուստամ Բաքոյանը տվել է 2 հարց, ունեցել 0 ելույթ, բացակայել է 144 անգամ: Իշխանական թևից պատգամավոր Արման Բոշյանը տվել է 2 հարց, ունեցել 0 ելույթ, բացակայել է 68 անգամ: Իմ Քայլից Հռիփսիմե Գրիգորյանը տվել է 3 հարց, ունեցել 0 ելույթ, բացակայել է՝ 130 անգամ: Պատգամավոր Սեդրակ Թևոնյանը տվել է 0 հարց, ունեցել է 0 ելույթ, բացակայել է 11 անգամ: Վահե Ղալումյանի ակտիվության ցուցանիշները նույնպես անչափ տպավորիչ են՝ 0 ելույթ, 0 հարց և 26 բացակա: Նրանից հետ չի մնացել պատգամավոր Կարեն Սարուխանյանը՝ 0 ելույթ, 0 հարց և 26 բացակա: Հակոբ Սիմիդյանը՝ 0 ելույթ, 0 հարց և 70 բացակա:

Ահա, թերևս, նման ակտիվության դիմաց էլ պատգամավորները որոշել են ինքնապարգևատրվել, ի վերջո նրանց տիտանական ջանքերը, եռանդը, որը ներդրել են այս քառօրյայի աշխատանքները կազմակերպելու, հանրօգուտ օրենսդրական նախագծեր մշակելու վրա (օրինակ տույժ-տուգանքների ավելացում) չպետք է մնա չգնահատված: Առնվազն սեփական քաղաքացիներին ծաղրելու առումով պետք է փաստենք, որ ՔՊ-ն «խփել» է ՀՀԿ-ի «ռեկորդը» կամ էլ շատ մոտ է դրան...

Այս թեմայով

ՄԱԿ է գնացել՝ հեծանվի հայտնագործության գյուտով․ Կարևորը «պոզիտիվ» մտածելն է․ Պատգամավորը՝ Փաշինյանի ելույթի մասին

Շիրակի մարզի ֆերմերներն այս տարի ևս կանգնած են բերքն իրացնելու լուրջ խնդրի առաջ․ պատգամավոր

Դոնբաս այցից հետո Մոսկվայում հանդիպեցինք ՌԴ պետդումայի պատգամավոր Կոնստանտին Զատուլինի հետ. Թևանյան