ՄԱԿ-ը պաշտոնական մեղադրանք առաջադրեց Ասադի կառավարությանը

Օգոստոսի 15-ին հրապարակված` ՄԱԿ-ի Մարդու իրավունքների անկախ հանձնաժողովի զեկույցը դարձավ ռազմական հանցագործությունների մեջ  Սիրիայի իշխանությունների հասցեին առաջին պաշտոնական մեղադրանքը։ Հանձնաժողովը ստեղծվել էր Սիրիայի Հուլա քաղաքում տեղի ունեցած զանգվածային սպանությունների հետաքննման համար, որտեղ զոհվել է ավելի քան հարյուր մարդ։ Ըստ զեկույցի, Սիրիայի Հուլա քաղաքում տեղի ունեցած սպանությունների մեջ մեղավոր են կառավարական զորքերը։

ՄԱԿ-ի փորձագետները եզրակացրել են, որ քաղաքացիական բնակչության զանգվածային սպանությունները, խոշտանգումները, բռնությունը, այդ թվում նաև՝ սեռական,   իրականացվել են «պետական քաղաքականության համաձայն, ինչը ցույց է տալիս բանակի ղեկավարության, անվտանգության ուժերի և պետության ներգրավվածությունը այս գործում»:

Հանձնաժողովը կազմել է մարդկության դեմ հանցագործություն կատարած կոնկրետ անձանց ցուցակը։ Այս փաստաթուղթը դեռ մնում է գաղտնի: Ապստամբները ևս մեղադրվել են ռազմական հանցագործությունների մեջ, այդ թվում նաև՝ սպանությունների և խոշտանգումների: Սակայն այդ հանցագործությունները, ինչպես նշում են փորձագետները, իրենց մասշտաբով և ծանրության աստիճանով համեմատելի չեն կառավարական ուժերի և նրանց հավատարիմ զինված խմբերի հանցագործությունների հետ: Հաշվետվությունը կներկայացվի ՄԱԿ-ի գլխավոր քարտուղարին, որը կարող է առաջարկել Անվտանգության Խորհրդին քննարկել այն: