ԱԱԾ-ն մութ սենյակում սև կատո՞ւ է փնտրում

Այսօր կառավարությունը հավանության է արժանացրել Ազգային անվտանգության ծառայության ներկայացրած՝  «Փախստականների և ապաստանի մասին» ՀՀ օրենքում փոփոխություններ և լրացում կատարելու օրենքի նախագիծը: Ըստ այդմ՝ ապաստանի տրամադրումը կմերժվի, եթե ապաստան հայցողը ԱԱԾ-ի եզրակացությամբ հնարավոր վտանգ կներկայացնի ՀՀ ազգային անվտանգության համար:

Առաջին հայացքից միանգամայն նորմալ թվացող այս նախագիծը մի շարք հարցեր է ծնում: Մասնավորապես՝ ինչո՞ւ հենց այս պահին գիտակցվեց վտանգը. բազմաթիվ սիրիահայ փախստականներ են ապաստանում Հայաստանում, որքանո՞վ է օրենսդրական նախաձեռնության պահի ընտրությունը բխում այս հանգամանքից: Երկրորդ՝ ինչպես պետք է որոշվի այդ «հնարավորը», և արդյո՞ք այս ենթադրական սահմանափակումը չի խոչընդոտի գաղթօջախներից մեր հայրենակիցների՝ հայրենիքում հանգրվանելուն: Երրորդ՝ որքանո՞վ է նախաձեռնությունը կապված միջազգային ահաբեկչության դեմ պայքարի և, այսպես ասած, «սև ցուցակի» երկրների գոյության փաստի հետ և այլն:

Փորձեցինք պարզաբանում ստանալ ԱԱԾ մամուլի պատասխանատուից, սակայն պարոն Արծվին Բաղրամյանը, իր ասելով, արձակուրդում էր և առաջարկեց այս հարցերը գրավոր ուղղել գերատեսչության ղեկավարին, որը և հավանաբար կանենք:

Նախագծին անդրադառնալ նպատակահարմար չգտավ նաև Կառավարության իրավաբանական վարչության պետը:

Սակայն հատկապես զարմանալի էր Տարածքային կառավարման նախարարության Միգրացիոն ծառայության պետ Գագիկ Եգանյանի նյարդային արձագանքը: Հարցերը դեռ չլսած՝ պարոն Եգանյանն ասաց.«Բայց եթե մեզ և ձեզ վտանգ է սպառնում, ի՞նչ անեն»։ Մեր ճշտող հարցին, թե ինչ վտանգի մասին է խոսքը, պարոն Եգանյանն այդպես էլ չպատասխանեց և վայր դրեց լսափողը:

Մնում է ոլորտի պատասխանատուներին ևս մեկ անգամ հիշեցնել. շատ ավելի վտանգավոր բաներ ու անձինք կան Հայաստանում, քան, ասենք, մի սփյուռքահայ, որը գուցե ոչ մի սպառնալիք էլ չի ներկայացնելու ՀՀ անվտանգությանը, սակայն Հայաստանի ԱԱԾ-ն մինչև նրան ոտքից գլուխ չզննի, չի թողնի հայրենիքում պատսպարվել:

Նանե Մակուչյան