Սերգեյ Չալյանի հրաժարականը կապված չէ Սեյրան Օհանյանի հետ. ՊՆ խոսնակ

Այսօրվա ասուլիսին Հայաստանի պաշտպանության նախարարության մամլո քարտուղար Արծրուն Հովհաննիսյանը չբացառեց Հայաստանում զինվորական ծառայության զորակոչի ողջ համակարգի հնարավոր փոփոխությունը։

«Մենք գիտենք, որ զորակոչի ներկա համակարգը ժառանգված է խորհրդային ժամանակներից, և հաճախ այդ մեխանիզմը չի արդարացնում իրեն»,- նշեց բանախոսը։

Արծրուն Հովհաննիսյանը չի հերքում, որ բանակում լինում են ինքնասպանություններ, օրինախախտումներ, բայց ընդհանուր առմամբ, դեպքերի ցուցանիշների նվազում է նկատում, որն իրականացվում է հետևողական և դժվարին աշխատանքի միջոցով։ Օրինակ, զինվորների հետ աշխատանք է տարվում հոգեբանների, հրամանատարների և մշակութային գործիչների կողմից, իրականացվում է ֆիլմերի դիտում, սպորտային, ընկերակցական և այլ միջոցառումեր։ Նա նաև նշեց, որ զորակոչի մեխանիզմները տարեց տարի խստանում են։

ՊՆ մամուլի խոսնակը հերքեց մամուլում շրջանառվող այն լուրերը, թե Չալյանի հրաժարականը կապված է եղել պաշտպանության նախարար Սեյրան Օհանյանի անձնական հարաբերությունների հետ։

Հիշեցնենք, որ վերջերս գեներալ-մայոր Սերգեյ Չալյանը նախագահի ստորագրությամբ ազատվել է Հայաստանի Հանրապետության զինվորական կոմիսարի պաշտոնից։