Հայաստանի քաղաքական ուժերը` Pussy Riot-ի մասին

ԱՐԽԻՎ 18 Օգոստոս, 2012 16:22

Այսօր Pussy Riot փանկ խմբի աղջիկների 2 տարով դատապարտման մասին Lurer.com-ը տեսակետներ հավաքեց հայաստանյան քաղաքական գործիչներից։ Մեր հարցերին պատասխանեցին ՀԱԿ-ի, ՀՀԿ-ի և Ժառանգության ներկայացուցիչները: ԲՀԿ-ց խուսանավեցին որևէ կերպ արձագանքել հարցին` պատճառաբանելով, թե արձակուրդում են:

ԱԺ ՀԱԿ խմբակցության անդամ, ՍԴՀԿ ատենապետ Լյուդմիլա Սարգսյանը կարծում է, որ այսպիսի ձերբակալությունները, երբ մարդիկ համարձակ արտահայտում են իրենց դժգոհությունը, քաղաքական ենթատեքստ են ունենում. «կարծում եմ՝ 2 տարվա ազատազրկումը չափից ավելին է, և, եթե նույնիսկ դա քաղաքական ենթատեքստ ունի, պետք էր մի փոքր ավելի մեծահոգի լինել՝ հասկանալով, որ նրանց դժգոհություններն անհիմն չեն։ Ցավում եմ, որ նման երևույթներ դեռ կան մեր տարածաշրջանում։ Դրա դեմ ևս պետք է կարողանանք պայքարել, և հասնել այն բանին, որ մարդն ազատ արտահայտվելու հնարավորություն ունենա և դրա համար չպատժվի։ Ավել ոչինչ չեմ ուզում ասել»։

ՀՀԿ կուսակցության անդամ, ԱԺ արտաքին հարաբերությունների մշտական հանձնաժողովի նախագահ Արտակ Զաքարյան. «Դրա հիմքերը մի փոքր այլ են։ Քաղաքական վրեժխնդրության ենթատեքստ չեմ տեսնում, կարծում եմ դատարանը ՌԴ-ի օրենքներին համապատասխան որոշում է կայացրել։ Խնդրի բարոյահոգեբանական կողմն էլ կա. գոյություն ունեն արժեքներ, որոնց նկատմամբ ոտնձգություններ անելը սխալ է։ Նկատի ունեմ, որ հոգևոր արժեքները և հոգևոր սրբությունները պետք է առանձնահատուկ հարգանք ունենան հասարակության յուրաքանչյուր անդամի կողմից։

«Ժառանգություն» խմբակցության ղեկավար Ստեփան Սաֆարյան. «Չեմ ընդունում նրանց արարքը։ Աղջիկները չափազանց մոտ են եղել քրիստոնեական հավատքը վիրավորելուն, եթե չասեմ` ուղղակիորեն արել են դա։ Չի կարելի էքսցենտրիկ մի խմբի, որը բողոք ունի արտահայտելու, սատարել միայն այլընտրանքային տեսակետ արտահայտելու համար։ Իհարկե, համաձայն չեմ 2 տարվա պատժաչափի հետ, բայց չդապարտել նրանց` նշանակում է Ռուսաստանը ներքաշել դավանանքային բախումների ոլորտ: Եթե այդ խմբի արարքը համարենք նորմալ, ապա նույն կերպ կարող ենք նորմալ համարել քրիստոնեական դավանանք կրող խմբավորումների կողմից այլ դավանանքների նկատմամբ ոտնձգությունը և վիրավորանքը»։

Հիշեցնենք` երեկ Մոսկվայի Խամովնիչյան դատարանը Pussy Riot խմբի աղջիկներին դատապարտեց 2-ական տարվա ազատազրկման: Նադեժդա Տոլոկոննիկովան, Մարինա Ալյոխինան և Եկատերինա Սամուտարիչը փետրվարին գրոհել էին Մոսկվայի Քրիստոս փրկչի եկեղեցու խորանը և երգել «Աստվածամայր, վռնդիր Պուտինին» շարականը:

Դատավճիռն արդեն քննադատել են ԱՄՆ պետդեպարտամենտն ու Եվրամիության երկրները:

Նելլի Ավետիսյան