«Հարսնաքարի» գործով նախաքննության մարմնի միակ նպատակը ոճրագործներին չհայտնաբերելն է. փաստաբան

«Հարսնաքար» ռեստորանային համալիրի տարածքում հունիսի 17-ի բռնարարքի գործով տուժող կողմի փաստաբանները քրեական գործի նյութերին ծանոթանալուց հետո երկրորդ անգամ ներկայացրել էին համապատասխան միջնորդություններ։

Փաստաբանները միջնորդությամբ պահանջել էին, որպեսզի կատարվի «Հարսնաքար» ռեստորանային համալիրի տարածքի ամբողջական զննութուն՝ պարզելու, թե որտեղ են տեղակայված եղել տեսախցիկները կամ հանցագործության դեպքից հետո տեսախցիկներն ապամոնտաժելու դեպքում, որ մասում են դրանք եղել։ Նրանք պահանջել էին նաև ռեստորանային համալիրում եղած բոլոր պրոցեսորները, արդեն իսկ առգրավված պրոցեսորի հետ ճանաչել որպես իրեղեն ապացույց, ապա դրանք ներկայացնել մասնագետներին՝ պարզելու, թե արդյոք այդ կրիչների վրա պարունակվում են դեպքի օրվա տեսաձայնագրության ֆայլեր, իսկ դրանց բացակայության դեպքում ՝ արդյոք դրանք չէին կարող ջնջված լինել էլեկտրոնային կրիչներից: Բացի այդ միջնորդել են, որպեսզի համեմատական ստուգման ենթարկվի առգրաված պրոցեսորի ժամանակագրական կարգավորումների և իրական ժամանակի միջև առկա տարբերությունները։

Ըստ Ռուբեն Հայրապետյանիտված ցուցմունքի՝  2012թ. հունիսի 17-ին նա գտնվել է Սևանում և այնտեղից վերադառնալուց հետո, ժամը 19.00-ի մոտակայքում կարճատև ժամանակահատվածով գտնվել է «Հարսնաքար» ռեստորանային համալիրում, իսկ այնուհետև` ՀՖՖ-ի «Տեխնիկական կենտրոն Ակադեմիայում»: Ինչպես վկայում են Վիվասել-ի տրամադրած հեռախոսային վերծանումները նույն օրը «Հարսնաքար»-ի աշխատակիցներ Արթուր Բաբլոյանը, Նորայր Հայրապետյանը, Արման Խաչատրյանը, Արման Բաղդասարյանը, Գարիկ Մարգարյանը նույնպես կեսօրից, մոտ ժամը 14.00-ից մինչև մոտ ժամը 19.00 գտնվել են Սևանում, իսկ «Beeline»(Արմենտել) և «Ղարաբաղ տելեկոմ» ընկերությունների տրամադրած հեռախոսային վերծանումների վերջիններիս երթուղին ենթադրաբար նույնն է եղել, ինչ Ռուբեն Հայրապետյանինը։ Դատելով ալեհավաքների տվյալներից` նրանք ժամը 19.30-22.40-ն ընկած ժամանակահատվածում գտնվել են «Հարսնաքար» ռեստորանի և/կամ ՀՖՖ ակադեմիայի տարածքում: «Ռուբեն Հայրապետյանի առնչությունն այս հանցագործությանը պետք է կասկածի տակ դրվեր հենց այն հանգամանքի բերումով, որ նույնիսկ իր անձնական թիկնազորի անդամ հանդիսացող Գարիկ Մարգարյանին Վահե Ավետյանին ծեծի ենթարկելու վերաբերյալ հրահանգ ունենալու և Ռուբեն Հայրապետյանի կողմից Վահե Ավետյանին ծեծի ենթարկելու պահին «Հարսնաքար» համալիրում գտնվելու վերաբերյալ հարցին` Գ. Մարգարյանն ուղղակիորեն հրաժարվել է պատասխանել: Եթե Ռ. Հայրապետյանն իրապես առնչություն չուներ այս հանցագործությանը, ապա ինչն էր խանգարում նրա «զինվորներից» մեկի կողմից այդ առնչությունը հերքելուն»-նշեց փաստաբան Լուսինե Հակոբյանը։

Փաստաբանները միջնորդել են սույն գործով որպես կասկածյալ ներգրավել Ռուբեն Հայրապետյանին՝ հաշվի առնելով այն հանգամանքը, որ ի վերջո հաճախորդներին ծեծի ենթարկելու հետ կապված չափազանց պատասխանատու հարցերը ակնհայտորեն կարող են լուծվել միայն սեփականատիրոջ բարձր հովանու ներքո, և նրա հեռախոսային համարների վերծանումները ստանալու միջնորդություն հարուցել դատարան, նրան և գործով մեղադրյալներին հարցաքննել այս հարցերի կապակցությամբ: Առհասարակ, այս քրեական գործում հեռախոսահամարների նույնականացման հետ կապված իրողությունը զավեշտալի է նաև այն իմաստով, որ մեղադրյալների կողմից օգտագործված հեռախոսահամարները ճշտվել են միայն այդ անձանց կատարած հայտարարությունների վրա։ Սա կարող է վկայել այն մասին, որ նախաքննության մարմնի կողմից ոչ մի ջանք չի գործադրվել պարզելու՝ արդյոք մեղադրյալների մոտ այլ հեռախոսահամարներ եղել են, թե չէ, և պարզել այդ հեռախոսահամարների զանգերի ցանկը:

Սույն քրեական գործում նախաքննության մարմնի կողմից թույլ տված ամենամեծ բացթողումը և սխալը հանդիսանում է այն, որ առ այսօր նախաքննության մարմնի կողմից չի պարզվել՝ ով է Վահե Ավետյանին հասցրել մահվան պատճառ հանդիսացող հարվածը /հարվածները/: Այսինքն՝ նախաքննության մարմնի կողմից փաստորեն չի բացահայտվել Վահե Ավետյանի սպանությունը, այլ երեք հատոր փաստաթղթեր հավաքելու և կազմելու միջոցով ընդամենը փորձ է կատարվում տպավորություն ստեղծել, թե հանցագործությունը բացահայտված է, իսկ ավելի կոնկրետ՝ այս կերպ փորձ է արվում կոծկել այն։

«Ակնհայտ է, որ այս վիճակով գործը դատարան ուղարկելու՝ նախաքննության մարմնի միակ նպատակը մի կողմից՝ ոճրագործներին չհայտնաբերելը և արդարադատության չհանձնելն է, մյուս կողմից՝ արդեն իսկ մեղադրվող անձանց դատարանում արդարացման և անպարտ ճանաչելու համար անհրաժեշտ մեղադրանքներով ապահովելը»,- Lurer.com-ի հետ զրույցում ասաց փաստաբան Լուսինե Հակոբյանը։ Իրենց միջնորդությունում փաստաբանները խնդրել են վերը նշված բոլոր միջնորդությունները բավարարել և ապահովել դրանց կատարումը, վերսկսել սույն քրեական գործի նախաքննությունը և կատարել վերը նշված միջնորդությունների բավարարմանն ուղղված բոլոր քննչական գործողությունները, բացահայտել հանցագործության ամբողջական պատկերը, ապահովել նախաքննության բազմակողմանիությունը, Վահե Ավետյանին մահացու հարված հասցնելը վերաորակել որպես սպանություն, հայտնաբերել այդ սպանությունը կատարած անձանց և նրանց առաջադրել իրենց արարքին համարժեք մեղադրանքներ: Սակայն, միջնորդությունը ներկայացնելուց մի քանի ժամ անց քննչական խմբի ղեկավար Ռուբեն Մկրտչյանի կողմից փաստաբանները հեռախոսազանգով տեղեկացվել են, որ միջնորդությունը մերժվել է, ավելի ուշ փոստով կուղարկվի մերժման մասին որոշումը։

Նելլի Ավետիսյան