Ռուբեն Հայրապետյան. Ես պատգամավոր չեմ

Վերջին օրերին հայաստանյան մամուլում ակտիվորեն շրջանառվում է լուրը, թե Երևանի Ավան թաղամասում ինչ-որ անձինք և խմբեր  Ռուբեն Հայրապետյանին պատգամավորության հրաժարումից հետ պահելու նպատակով ստորագրահավաք են իրականացնում:

Մասնավորապես, «Հայկական Ժամանակ» օրաթերթն այդ մասին գրել է, որ ստուգել է, լուրերը հաստատվել են, և ստորագրահավաքը թափ է հավաքում: «Տեքստը, որի տակ պետք է հնարավորինս շատ ստորագրություն հավաքվի, շատ նման է այն նամակին, որ մի քանի շաբաթ առաջ ստորագրել էին մի քանի «մտավորականներ»: Այսինքն՝ խնդրում են Ռուբեն Հայրապետյանին, որ նա Աժ նախագահից ետ վերցնի մանդատը վայր դնելու մասին դիմումը, քանի որ ազգն իրեն «ընտրել է, վստահում է...» և նմանատիպ լոլոներ»,-գրել էր «ՀԺ»-ն:

Lurer.com-ը մի քանի հարց ուղղելու նպատակով զանգահարեց պատգամավոր Ռուբեն Հայրապետյանին: Մասնավորապես հարցնելու էինք՝ «Տեղյա՞կ եք Ձեր անվան հետ կապվող գործողություններց և դրանց մասին մամուլի հրապարակումներիցն, ի՞նչ միջոցառումներ եք ձեռնարկում, եթե ձեռնարկում եք, Ձեր՝ պատգամավորությունից հրաժարվելու որոշման դեմ այդ գործընթացները կասեցնելու ուղղությամբ» և այլն:

Նախ մեր հարցին՝ կարո՞ղ ենք իրեն մի քանի հարց ուղղել, Ռուբեն Հայրապետյանն ասաց, որ հեռախոսով հարցերի չի պատասխանում: «Շատ լավ, ասացեք ձևաչափը, այդպես զրուցենք»,-մեր առաջարկին ի պատասխան ասաց. «զանգեք իմ մամուլի խոսնակին»: «Ո՞ր պաշտոնի բերումով Ձեր խոսնակին, պարոն Հայրապետյան, ես Ձեզ իբրև պատգամավոր եմ հարց ցանկանում ուղղել» հարցին էլ պատասխանեց. «Ես պատգամավոր չեմ»:

Թեև դեմ ենք մարդկանց, այդ թվում՝ քաղաքականության մեջ ներգրավված, իրենց կամքին դեմ հարցախեղդ անել, սակայն անկեղծորեն ցանկանում էինք զրուցել պարոն Հայրապետյանի հետ: Չստացվեց: Մեզ և մեր ընթերցողների համար Ռուբեն Հայրապետյանի խոսքերը մի քիչ հասկանալի դարձնելուն միտված մի քանի հարցն ընդհատվեց «ես հո սպռավոչնի բյուրո չե՞մ» արտահայտությամբ:

Հավանաբար պարոն Հայրապետյանին թվաց, թե մենք ենք «սպռավոչնի բյուրո», որովհետև անսպասելի հարցադրեց. «Ո՞վ ա ձեր խազեինը»: «Լրատվամիջոցները խազեին չեն ունենում, գուցե խմբագի՞րը ուզում էիք հարցնել»,-փորձեցինք ճշտել, սակայն Հայրապետյանն անմիջապես ընդհատեց զրույցը:

Հաշվի առնելով Ռուբեն Հայրապետյանին բազմակի անգամներ զանգելու՝ մեր գործընկերների փորձերի տխուր հետևանքները, այլևս չզանգեցինք:

Նանե Մակուչյան