Դեղատոմսերն այլևս չեն կնքվի և չեն դրոշմակնքվի

Օգոստոսի 25-ից ուժի մեջ են «Հայաստանի Հանրապետությունում կիրառվող դեղատոմսային ձևաթղթերը հաստատելու մասին» ՀՀ կառավարության 2001 թ. օգոստոսի 14-ի որոշման մեջ կատարված փոփոխությունները:

Ըստ այդմ, վերացվում է դեղատոմսային ձևաթղթում բժշկի կողմից փաստաթուղթը կնիքով վավերացնելու, ինչպես նաև բժշկական կազմակերպության կնիքով հաստատելու պահանջը: Այսուհետ դեղատոմսը, այդ թվում նաև զեղչով դեղատոմսը, ուժի մեջ է այն դուրս գրող բժշկի ստորագրության առկայության դեպքում, և բժշկի անձնական ու բժշկական կազմակերպության կնիքների, դրոշմակնիքի առկայությունն այլևս անհրաժեշտ պայման չի դիտվի: Ընդ որում' սա վերաբերում է ինչպես սովորական, այնպես էլ թմրադեղերի և հոգեմետ դեղերի համար նախատեսված դեղատոմսային ձևաթղթերին:

Կնիքի պարտադիր պահանջի վերացումը պայմանավորված է «Դեղերի մասին» օրենքում ընթացիկ տարվա մարտի 19-ին կատարված փոփոխությամբ' կնիքների օրենսդրական պահանջի վերացմամբ: Մինչ այդ առկա օրենսդրության համաձայն՝ մի շարք փաստաթղթեր լրացնելիս կամ կազմելիս բժիշկը պարտավոր էր դրանք հաստատել կազմակերպության կնիքով, իսկ որոշ դեպքերում կնիքով վավերացնելը թողնված էր բժշկի հայեցողությանը:

Կառավարության հիմնավորմամբ, բժշկի կողմից կնիքի ձեռք բերումը ոչ միայն դանդաղեցնում է համապատասխան ծառայության մատուցումը, այլև կնիքի օգտագործումը, ինչպես ցույց է տվել փորձը, հավելյալ երաշխիք չի ստեղծում, որ փաստաթղթերը չեն կեղծվի: