ՀՀ-ում արդարադատություն չէ, այլ՝ մարմնավաճառություն

«Հայաստանի Հանրապետությունում արդարադատություն չէ, այլ՝  մարմնավաճառություն։ Հայաստանում դատարանը սպասարկում է քրեական օլիգարխների, ոչ թե՝ քաղաքացիների շահերը։ Իհարկե, ես առաջին անգամ չեմ հայտնաբերում սա, բայց այս դատավճիռը ևս մեկ անգամ հաստատեց այս փաստը»,- Lurer.com-ի հետ զրույցում ասաց իրավապաշտպան, ՀՔԱ Վանաձորի գրասենյակի նախագահ Արթուր Սաքունցը։

Իսկ այն հարցին, թե ի՞նչ է պատրաստվում անել իրավապաշտպանը, պատասխանեց. «բնականաբար բողոքարկելու եմ»։

Հիշեցնենք, որ Արթուր Սաքունցը պահանջում էր Ռուբեն Հայրապետյանին պարտավորեցնել հրապարակայնորեն ներողություն խնդրել և որպես փոխհատուցում Ռուբեն Հայրապետյանից բռնագանձել 1 (մեկ) լումա:

Հիշեցնենք, որ Արթուր Սաքունցի կողմից հայցադիմում ներկայացնելու հիմք է հանդիսացել 2012 թ. մայիսի 25-ին Հայաստանի հանրային հեռուստաընկերությամբ ցուցադրված «Լրացուցիչ ժամանակ» սպորտային հաղորդումը, որտեղ հաղորդման հյուրը` Հայաստանի ֆուտբոլի ֆեդերացիայի նախագահ Ռուբեն Հայրապետյանը, կատարել է հետևյալ արտահայտությունները. «Երբ որ ես Վանաձորում ուզում եմ ֆուտբոլի դպրոցը կառուցեմ, ոչ մի ծառ, ոչ մի թուփ չկա, սարի վրա դպրոց եմ կառուցում, բայց չգիտես ինչի հայտնվեց Հելսինկյան մի հատ ինչ-որ անհասկանալի օղերով մի հատ շան ծնունդ ու բռնեց դատի տվեց մեզ, քաղաքապետարանին, ավագանու որոշմանը, այդ թվում ֆեդերացիան` որպես երրորդ` պատասխանող կողմ: Հիմա դրանք մի քանի կոպեկ արտասահմաններից էդ գռանտները ստանում են, իրանց գռանտների հաշվին ցանկացած գեղեցիկ բան այսօր վարկաբեկում են»: