Ոստիկանությունը դադարեցրել է Գյումրու քաղաքապետի թիկնազորի լիազորությունները

Գյումրիում հնչած կրակոցների պատճառով Վարդան Ղուկասյանի թիկնապահներից մեկի՝ Հարություն Համբարյանի ձերբակալումից հետո ոստիկանությունը այսօր դադարեցրել է Գյումրու քաղաքապետի թիկնազորի լիազորությունները, հայտնում է Aravot.am-ը: Այլ կերպ ասած՝ քաղաքապետին այլևս արգելել են ման գալ թիկնապահներով: Նրանց զինաթափել են ու Վարդան Ղուկասյանին առաջարկել՝ եթե քո անվտանգության մասին ես մտածում, ապա անհրաժեշտության դեպքում դիմիր մեզ՝ քեզ ոստիկանական պահակախումբ կառաջարկենք:

Նշենք, որ իր դեմ կատարված մահափորձից հետո, պարոն Ղուկասյանը թիկնապահների մեծ խմբով էր ման գալիս, նրան ուղեկցում էին մոտ 5 հոգի:

ՀՀ ոստիկանության լրատվության և հասարակայնության կապերի վարչությունից փոխանցել են, որ Գյումրու քաղաքապետը պայմանագրային հիմունքներով ուներ թիկնազոր, որի պայմանագրի ժամկետը լրացել է , ու ոստիկանությունը այն չի թարմացրել: Այսինքն՝ քաղաքապետի պահպանության բաժնի աշխատակիցները եղել են ոստիկաններ:

Ըստ Aravot.am-ի աղբյուրների՝ քաղաքապետը միջնորդ է փնտրում երկրի նախագահի հետ հանդիպելու ու որդու վիճակը մեղմացնելու նպատակով:

Հիշեցնենք, որ Ղուկասյաններին պատկանող «Հրաշքների աշխարհ» մանկական խաղասրահի դիմաց տեղի ունեցած հաշվեհարդարի ու հնչած կրակոցների պատճառով քրեական գործ է հարուցվել նաև քաղաքապետի որդու` Սպարտակի դեմ: Նրան մեղադրում են Քրեական օրենսգրքի 258 հոդվածի 4-րդ մասով` խուլիգանություն կատարելու մեջ, որը նախատեսում է 4 –ից մինչև 7 տարի ազատազրկում, և 235 հոդվածի 1-ին մասով, որը սահմանում է. «Ապօրինի կերպով հրազեն, բացի ողորկափող հրազենից, և դրա փամփուշտներից, ռազմամթերք ակոսափող հրազենի փամփուշտներ, պայթուցիկ նյութեր կամ պայթուցիկ սարքեր ձեռք բերելը, իրացնելը, պահելը, փոխադրելը կամ կրելը պատժվում է կալանքով' առավելագույնը 3 ամիս ժամկետով, կամ ազատազրկմամբ՝ առավելագույնը 3 տարի ժամկետով»:

Հիշեցնենք, որ քաղաքապետի որդին հետախուզման մեջ է: