«Զգուշացե՛ք, երեխաներ են» ծրագիրը կտևի 1 ամիս

Այս ուսումնական տարվա մեկնարկին Ճանապարհային ոստիկանության կողմից իրականացվող «Զգուշացե՛ք, երեխաներ են» ծրագիրը 10 օրվա փոխարեն կտևի մեկ ամիս: Այս մասին այսօր լրագրողների հետ հանդիպման ժամանակ տեղեկացրեց ՀՀ ճանապարհային ոստիկանության ճանապարհապարեկային ծառայության բաժնի պետ Նորիկ Սարգսյանը։ 

Ծրագիրը մեկ ամիս ժամանակով իրականացնելու հիմնական պատճառը նախորդ տարիների փորձն է, պատահարների վիճակագրությունը:

«Նախորդ տարվա սեպտեմբերի առաջին տասնօրյակի վիճակագրությունը ցույց տվեց, որ անհրաժեշտ է երկարացնել ծրագրի տևողությունը: Անցած տարի սեպտեմբերի 1-ից 10-ը Երևանում գրանցվել է 10 ՃՏՊ, գրանցվել է 6 տուժող, մինչդեռ սեպտեմբերի 10-ից հետո մինչև ամսվա ավարտը գրանցվել է 25 ՃՏՊ, որոնց հետևանքով զոհվել է 1 մարդ, վիրավորվել 25-ը»,- նշեց Նորիկ Սարգսյանը:

Նորիկ Սարգսյանը նաև ասաց, որ ոստիկանապետի հանձնարարականով դպրոցների մոտակայքում Ոստիկանության աշխատանքը ևս երկարաձգվել է, քանի որ ամառային աշխույժ կյանքից բնականոն ռիթմին անցնելը դժվար է։

Բանախոսը կոչ արեց քաղաքացիներին ճանապարհն անցնել սահմանված վայրերով, քայլել մայթերով, հետևել լուսացույցի նշանին։ Վարորդներին խուրհուրդ տրվեց, որպեսզի լինեն ավելի զգոն, հատկապես՝ դպրոցների կողքով անցնելիս:

Նա նաև զգուշացրեց, որ 4-5 մեքենայով երեխաներին դպրոց տանող ծնողները, եթե երեխային իջեցնելուց հետո չազատեն ճանապարհի բանուկ մասը և առաջացնեն խցանումներ՝ կտուգանվեն 10-20 հազար գումարի չափով: