Կվերականգնվի՞ արդյոք արտասահմանում գտնվող ՀՀ քաղաքացիների ընտրելու իրավունքը. տեսակետները տարբեր են

Օգոստոսի 27-ին ՀՀ ԱԺ «Ժառանգություն» խմբակցության ղեկավար Ռուբեն Հակոբյանը խմբակցության անունից գրավոր դիմել է ՀՀ մարդու իրավունքների պաշտպանին՝ ՀՀ ընտրական օրենսգրքի 60-րդ հոդվածի սահմանադրականությունը ՀՀ սահմանադրական դատարանում վիճարկելու առաջարկով:

Այս հարցի առնչությամբ Lurer.com-ը զրուցեց  ԱԺ ԲՀԿ խմբակցության քարտուղար Նաիրա Զոհրաբյանի հետ, ով մասնավորապես նշեց. «ՀՀ յուրաքանչյուր քաղաքացի պետք է ունենա ընտրելու իրավունք՝ անկախ գտնվելու վայրից։ Բայց, քանի որ մենք ունենք խայտառակ ընտրական մեխանիզմներ, խայտառակ ընտրական ավանդույթներ և ընտրակեղծարարության կայուն և արմատացած ավանդույթներ, ապա ես կարծում եմ՝ Ռուբեն Հակոբյանի այս նախաձեռնությունն ունենալու է հակառակ էֆեկտ»։

 Նաիրա Զոհրաբյանն այս փուլում ձեռնպահ կմնա նման նախաձեռնություններից։ Իր  խոսքով, եթե այս դրույթը գործի, և բոլոր քաղաքացիներին, անկախ գտնվելու վայրից, ընտրելու հնարավորություն տրվի, մտավախություն կա, որ վարչական ռեսուրսներին տիրապետող ուժը օգտագործելու է հօգուտ իրեն։  Միգուցե նպատակը բարի է, բայց պետք է հաշվարկվի նաև հետևանքները, քանի որ Նաիրա Զոհրաբյանը լավ գիտի, թե դեսպանները ինչ հրահանգով են աշխատում Հայաստանում և ինչ են անելու. «Կրկնում եմ, խայտառակ ընտրական ավանդույթներ ունեցող երկրի համար, այդ դրույթը վարչական ռեսուրսին տիրապետող ուժի ձեռքում կարող է լինել հերթական գործիք՝ հերթական ընտրակեղծիքներ անելու համար։ Դրա հետևանքները կարող են վատ լինել, որովհետև ուղղակիորեն հնարավոր չի լինի վերահսկել՝ թե դեսպանատներում իրականում ով քվեարկեց, ինչ քվեարկեց և ինչ պատկեր է ուղարկվում Հայաստան։ Մենք գիտենք, թե դեսպանները ինչ հրահանգով են աշխատում Հայաստանում և ինչ են անելու,- նշեց Նաիրա Զոհրաբյանը և ավելացրեց,- ի դեպ, այս տեսակետին է «Ազատ դեմոկրատներ» կուսակցության փոխնախագահ Անուշ Սեդրակյանը, և ես համամիտ եմ նրա հետ։ Եթե մենք ապրեինք քաղաքակիրթ երկրում, որտեղ գործում են ընտրական բոլոր ինստիտուտները, ընտրակեղծարարությունը նման կայուն արմատներ չունենար՝ կարելի էր մտածել դրա մասին։

Նախաձեռնության մասին զրուցեցինք նաև «Ազատ դեմոկրատներ» կուսակցության փոխնախագահ Անուշ Սեդրակյանի հետ, ով կարծում է, որ առաջարկը պետք է համակողմանի քննարկվի։  «Առաջարկը պետք է ենթարկվի քաղաքագիտական ու քաղաքական փորձաքննության»,-ասաց նա։

ՕԵԿ խմբակցության ղեկավար Հեղինե Բիշարյանի խոսքով՝ առանց քննարկման, առանց հիմքերը հասկանալու և ընդհանրապես՝ առանց հասկանալու, թե այդ առաջարկությունն ինչ խնդիր է ուզում լուծել, գնահակատական տալ չարժե։

«Մենք Ընտրական օրենսգրքի վրա խորքային աշխատել ենք, և բոլոր քաղաքական ուժերը, այդ թվում՝ «Ժառանգություն» կուսակցությունը, աշխատել է այդ ուղղությամբ և հանդես եկել առաջարկություններով։ Նշված հոդվածի վերաբերյալ պետք է լինեն լուրջ քննարկում և հիմնավորումներ, որպեսզի բոլորս հասկանանք, թե իրենք ինչ են ուզում անել և դրա անհրաժեշտությունը որքանով կա։ Ընտրական օրենսգիրքը մենք վերջերս ենք լիարժեք փոփոխության ենթարկել և այդպիսի խնդիր չենք տեսել։ Այս  առաջարկը թող բերեն քննարկման՝ քաղաքական ուժերն էլ իրենց տեսակետներն ու մոտեցումները կասեն»,-ասաց Բիշարյանը։ 

Նելլի Ավետիսյան