«Ժողովուրդ». Ծառուկյանը նախագա՞հ, Քոչարյանը՝ վարչապե՞տ

Հայաստանում նախագահական ընտրություններից առաջ հետաքրքիր սցենարներ են մշակվում: Դրանցից թերևս ամենակարևորը կապված է «Բարգավաճ Հայաստան» կուսակցության հետ, որը մերթ ընդդիմադիր է խաղում, մերթ իրեն հռչակում այլընտրանքային ուժ, մերթ էլ, զգալով Սերժ Սարգսյանի կողմից իր «քցվածությունը», մերձենում է Ռոբերտ Քոչարյանի հետ:

Ու մինչ շատերը խոսում են այն մասին, որ Ռոբերտ Քոչարյանը պատրաստվում է վերադառնալ մեծ քաղաքականություն և առաջադրվել որպես ՀՀ նախագահի թեկնածու, ԲՀԿ-ն արդեն կուլիսներում քննարկել և հաստատել է մի սցենար, որն, իհարկե՛, կուսակցությունն դեռ հրապարակավ ժխտում է: Սակայն, ըստ «Ժողովուրդի» ունեցած տեղեկությունների, այն բանից հետո, երբ Սերժ Սարգսյանը Գյումրիում հայտարարեց, որ Բալասանյան Սամվելն իրենց՝ ՀՀԿ-ի թեկնածուն է, ԲՀԿ առաջնորդը, հայտնվելով անհարմար իրավիճակում, որոշեց «վա բանկ» գնալ և առաջիկա ընտրություններում առաջադրվել որպես նախագահի թեկնածու: Համենայն դեպս, Ծառուկյանը ՀՀԿ մի քանի «բերանբաց» երիտասարդների մոտ հաստատել է իր այդ մտադրությունը:

Բայց սա չի նշանակում, որ Ծառուկյանի կուսակցությունը «քաշում» է Քոչարյանին և չի կատարում նրա առջև ունեցած իր պարտականությունները: «Բարգավաճ Հայաստան» -ը երբեք չի կարող հեռու լինել Քոչարյանից, որովհետև սա նրա ստեղծած կուսակցությունն է և ամեն հարցում կատարում է քոչարյանական «դիրեկտիվները»: Քոչարյանը շատ լավ գիտակցում է, որ այնքան էլ մեծ չեն իր հնարավորությունները նախագահական ընտրություններում, որ չունենալով համապատասխան քաղաքական և հանրային ռեսուրս՝ ինքը կարող է պարտվել, ինչը նրա համար քաղաքական մահ կնշանակի: Ուստի առաջ է քաշվել «պահուստային» տարբերակը, որն առավել հուսալի է: Ըստ այդմ՝ նախագահի թեկնածու կառաջադրվի Գագիկ Ծառուկյանը: Հանրության շրջանում նա քիչ թե շատ ունի հեղինակություն, մեծ ֆինանսական հնարավորություններ և վստահելի լծակներ՝ հաղթանակի համար:

Չի բացառվում, որ Քոչարյան–Ծառուկյան–Օսկանյան եռյակը, ստանալով նաև այլ ուժերի աջակցությունը, կարողանա հասնել իր նպատակների իրագործմանը։ Իսկ այս դեպքում արդեն Ծառուկյանը մտադիր է վարչապետի պաշտոնում հաստատել Ռոբերտ Քոչարյանին։