Ամո՛թ՝ ուղղված ՆԱՏՕ–ի գլխավոր քարտուղարին

Քիչ առաջ նախագահական նստավայր ժամանեց ՆԱՏՕ–ի գլխավոր քարտուղար Անդրես ֆոգ Ռասմուսենը։ Այն պահին, երբ նա մտավ նախագահական նստավայր, երիտասարդ դաշնակցականները և «Նիկոլ Աղբալյան» երիտասարդական միության անդամները սկսեցին վանկարկել՝ «Ամո՛թ» ։

Ակտիվիստների ձեռքերին կային ցուցապաստառներ «Oil A New European Value?», «NATO Azerbaijan Cooperation», «NATO-Safarov» գրություններով և «Քնած դիվանագետը դիրքում քնած զինվորից վատ է» գրությամբ ցուցապաստառ, որին ամրացված էր նաև Էդվարդ Նալբանդյանի լուսանկարը։

Բողոքի մասնակիցներն իրենց հայտարարության մեջ ասացին, որ պահանջում են, որ ՆԱՏՕ–ն հանդես գա կոշտ հայտարարությամբ, ինչպես նաև դադարեցնի Ադրբեջան–ՆԱՏՕ անհատական գործակցությունը։ Այդ ամենը չանելու դեպքում նա կդառնա հանցագործության անմիջական մեղսակիցը»,– ասվեց հայտարարության մեջ։  

ՀՅԴ Հայաստանի Երիտասարդական գրասենյակի պատասխանատուն լրագրողների հետ զրույցում նկատեց, որ ՆԱՏՕ-ի անտեղյակությունը նոր սպանությունների դուռ է բացում, և որ մարդասպանը պետք է արժանի պատիժ ստանա։ 

Ցույցն ուղեկցվեց ազգային–ազատագրական երգերով և ծափահարություններով։