Դաշնակցական չստացված նախաճաշը Գյումրիում

Lragir.am-ն էլփոստով ստացել է բավական հետաքրքրական մի ցուցակ-շրջաբերական: Ցուցակն առնչվում է սեպտեմբերի 9-ին Գյումրիում տեղի ունեցած քաղաքապետի եւ Ավագանու ընտրությանը: Այն ունի նաեւ իր հետաքրքիր պատմությունը, որը ներկայացրել է էլեկտրոնային նամակի անանուն հեղինակը, ով ներկայանում է որպես ընտրական հանձնաժողովներից մեկի անդամ:

Ըստ այդմ, Գյումրիի քաղաքապետի դաշնակցական թեկնածու Հովսեփ Սիմոնյանը քաղաքապետի ընտրության օրը նախաճաշ է ուղարկել բոլոր ընտրական հանձնաժողովների դաշնակցական անդամներին: Այդ նախաճաշի մեջ էլ հենց եղել է ցուցակ-շրջաբերականը: Դրանում ընդգրկված են այն հանձնաժողովականների անունները, ում հետ ՀՅԴ հանձնաժողովականները պետք է փորձեին մտնել առեւտրի մեջ եւ բանակցել:

Հանձնաժողովներից մեկում սակայն ՀՅԴ անդամը տեղում չի եղել, իսկ նախաճաշ բերողներն էլ շփոթվել են ու այն հանձնել են մեկ ուրիշ մարդու, ինչի հետեւանքով էլ դաշնակցական նախաճաշի համը հասանելի է դարձել ամբողջ հասարակությանը:
{gallery}chash{/gallery} 

Արդյունքում, նախաճաշը վերածվել է ճաշի: Ներկայումս Դաշնակցությունը ինտենսիվ պարզաբանումների մեջ է եւ փորձում են բացահայտել տեղի ունեցածի մեղավորներին: Խոսքը ոչ թե թեկնածուների մի խմբի հետ բանակցությունների եւ առեւտրի մեջ մտնելու գործընթացի բացահայտման մասին է, այլ այն մասին, թե ինչպես է շրջաբերականը դարձել հանրային սեփականություն: ՀՅԴ-ում փորձում են դա պարզել, թե ում մեղքով է, որ չի ապահովվել օպերացիայի բավարար գաղտնիություն:

Հիշեցնենք, որ ՀՅԴ թեկնածուն երկրորդ տեղն էր զբաղեցրել Գյումրիի քաղաքապետի սեպտեմբերի 9-ին տեղի ունեցած ընտրությանը:

Lragir.am