Եվրախորհրդարանը Ասադի հրաժարականը պահանջող նոր բանաձև է ընդունել

Եվրախորհրդարանը հինգշաբթի օրը լիագումար նիստում Սիրիայի հարցով բանաձև է ընդունել, գրում է Риа Новости-ն։ Բանաձևում կոչ է արվում դադարեցնել երկրում մոլեգնող բռնությունները, իսկ նախագահ Ասադին՝ թողնել իշխանությունը։
Խորհրդարանականները սիրիական իշխանություններին մատնացույց են անում պաշարված քաղաքներից անհապաղ զորքերը դուրս բերելու անհրաժեշտությունը և հորդորում երկրի տարածք ազատ մուտք ապահովել միջազգային մարդասիրական օգնության և համաշխարհային ԶԼՄ-ների համար։
Բանաձևում ափսոսանք է հայտնվում այն կապակցությամբ, որ ՄԱԿ-ի Անվտանգության Խորհուրդը մինչ այսօր չի կարողացել ընդունել կոշտ բանաձև, որը վերջ կդնի Սիրիայում «արյունալի սպանդին»։ Բանաձևում կոչ է արվում Ռուսաստանին և Չինաստանին պատասխանատվություն ցուցաբերել և ընդունել փաստաթուղթը։ Ռուսաստանը և Չինաստանը բազմիցս արգելափակել են ՄԱԿ-ի ԱԽ՝ Սիրիային վերաբերող բանաձևերը։
Բացի այդ, փաստաթուղթը կոչ է անում ԵՄ-ին մեծացնել ճնշումը Ասադի վարչակարգի նկատմամբ, այսպես կոչված «սահմանափակիչ միջոցների» օգնությամբ՝ պատժամիջոցներ կիրառելով այն ընկերությունների նկատմամբ, որոնք ֆինանսական աջակցություն են ցուցաբերում Ասադի վարչակարգին։