Վերահսկիչ պալատի մասին ՀՀ օրենքը թյուրիմացությո՞ւն է

Վերահսկիչ պալատի 2011 թվականի հաշվետվությունից Գլխավոր դատախազությունը որևէ նյութ չի ստացել: Այս մասին Lurer.com-ի հետ զրույցում ասաց ՀՀ գլխավոր դատախազության մամլո խոսնակ Սոնա Տռուզյանը:

«Ես չգիտեմ՝ Վերահսկիչ պալատը որևէ այլ իրավապահ մարմնի ուղարկել է, թե ոչ, բայց Դատախազությունը չի ստացել»: Հարցին, թե Դատախազությունը չի՞ դիմում դրանք ստանալու համար, Տռուզյանն ասաց, որ Վերահսկիչ պալատի մասին օրենքի վեցերորդ հոդվածի համաձայն՝ քրեաիրավական բնույթի խախտումներ արձանագրելու դեպքում Վերահսկիչ պալատն ինքը պետք է այդ նյութերն ուղարկի:

Վերահսկիչ պալատի լրատվական ծառայության բաժնի պետ Աննա Վարդանյանը մեզ հետ զրույցում նշեց, որ որոշ գործերի վերահսկողական արդյունքները ստանալու նպատակով Վերահսկիչ պալատ դիմել են ՀՀ ոստիկանության քննչական գլխավոր վարչությունից:

«Թյուրիրմացությունը նրանում է, որ «Վերահսկիչ պալատի մասին» ՀՀ օրենքում գրված է, որ քրեաիրավական բնույթի կասկածների դեպքում նյութերն ուղարկվում են ՀՀ գլխավոր դատախազություն, սակայն կա մտածելակերպ, որ բոլոր դեպքերում նյութերը պետք է անպայման ուղղակիորեն ուղարկվեն Դատախազություն: Մինչդեռ, մեր իրավական համակարգն այնպիսին է, որ կարող է պատահել այնպես, որ որևէ քրեական գործ քննվի նաև այլ պետական իրավական համակարգում, որն ունի այդ իրավասությունը, տվյալ դեպքում դա ՀՀ ոստիկանության քննչական գլխավոր վարչությունն է: 

Իսկ ինչ վերաբերում է նրան, թե ով ավելի շուտ գործողություններ կսկսի, նման խնդիր ընդհանրապես դրված չէ ո՛չ օրենսդրությամբ, ո՛չ էլ տվյալ գործի տրամաբանության շրջանակներում: Կարող է պատահել այնպես, որ համապատասխան իրավապահ մարմինն ինքը դիմի ՀՀ վերահսկիչ պալատ և Վերահսկիչ պալատն ուղարկի, կարող է նաև պատահել հակառակը»:

Ազատուհի Արասխանյան