Ինչպես է ԿԲ նախագահը «փրկում» Նիկոլ Փաշինյանին

Երկու օր առաջ պարզ դարձավ, որ Կենտրոնական բանկը վերանայել է տնտեսական աճի կանխատեսումը: Ըստ այդմ՝ ԿԲ-ն 2021-ի համար տնտեսական աճի 4,6 % կանխատեսում ունի, այն դեպքում, երբ ԿԲ-ի՝ մարտի 16-ի կանխատեսման համաձայն՝ 2021–ի տնտեսական աճը գնահատվել էր 1,4 %։ Անգամ տնտեսագիտությունից անչափ հեռու անձանց համար էլ հասկանալի է, որ այսքան կարճ ժամանակահատվածում երկրի տնտեսության մեջ տեղի չեն ունեցել այնպիսի փոփոխություններ, որ ԿԲ-ն նման կտրուկ կերպով փոփոխության ենթարկի իր իսկ կանխատեսումները: ԿԲ նախագահ Մարտին Գալստյանի խոսքով՝ տնտեսական աճի կանխատեսման վերանայման վրա հիմնականում ազդել են ծառայությունների և արդյունաբերության ոլորտում աշխուժությունը։ Սակայն, դա էլ, մեղմ ասած, որևէ քննադատությանը չդիմացող պնդում է, քանի որ անգամ այս ոլորտներում արձանագրված աճը չէր կարող նման լավատեսական կանխատեսումների հիմք հանդիսանալ:

Ավելի քան հավանական է, որ Մարտին Գալստյանը պարզապես որոշել է օգնել Նիկոլ Փաշինյանին և  այս նախընտրական փուլում վերջինիս հանրության առջև հպարտանալու թվեր նվիրել: Իհարկե, հասկանալի է, որ Փաշինյանը օգտագործելու է այս փոփոխված կանխատեսումը ի նպաստ իրեն, ցույց տալու համար, որ տնտեսությունը արագ տեմպով զարգանում է, իսկ դա իր հերթին նշանակում է, որ ապագա կա: Ըստ էության, Գալստյանը այսպես որոշել  է վարձահատույց լինել Փաշինյանին՝ նման բարձր պաշտոնը իրեն շնորհելու համար...