Ադրբեջանի հաջորդ քայլը կլինի Սաֆարովին սպանելը. Կոմանդոս

«Ոչ մի պետություն միայնակ չի կարող պաշտպանել իր երկրի անվտանգությունը: Մենք ՀԱՊԿ-ի անդամ պետություն ենք և դժվարին պահերին պետք է օգնենք միմյանց: Տարիներ են անցել, ինչ ստեղծվել է ՀԱՊԿ-ը, բայց այդքան էլ պարզ չէ՝ երբ է սկսվելու այդ օգնությունը: Հայաստանում տեղի ունեցած զորավարժություններով վերջապես որպես ռազմական դաշինք սկսեց գործել ՀԱՊԿ-ը: Մեկնարկը հաջողությամբ տրվեց, և այսպիսի դաշինքի ստեղծումն անհրաժեշտություն է»: Այս մասին այսօր լրագրողների հետ հանդիպմանն ասաց Արցախյան ազատամարտի հերոս, ՀՀ ՊՆ նախկին փոխնախարար Արկադի Տեր-Թադևոսյանը։ 

Վերջինս նաև կարծիք հայտնեց, որ հնարավոր վտանգի դեպքում դժվար է ասել՝ ՀԱՊԿ անդամ երկրները կօգնեն մեզ, թե՝ ոչ: Այդ ժամանակ, ըստ նրա, մեզ կաջակցի Ռուսաստանը, Բելառուսը և գուցե նաև՝ Ադրբեջանի հետ խնդիրներ ունեցող Ղազախստանը։ 

Կոմանդոսի կարծիքով՝ Արցախում հնարավոր պատերազմի դեպքում մեր հարևան Վրաստանը բացահայտ կաջակցի Ադրբեջանին։

Անդրադառնալով ադրբեջանցի մարդասպան Սաֆարովի ազատազրկմանը՝ Կոմանդոսն ասաց. «Չեմ կարծում, որ Ադրբեջանը, Թուրքիան և Հունգարիան չէին կարող սխալվել այդքան լուրջ հարցի վերաբերյալ: Նրանք շատ լավ գիտակցել են իրենց արածը։ Ադրբեջանի հաջորդ քայլը կլինի Սաֆարովին սպանելու հարցը. նրանք կսպանեն, հետո մեղքը կգցեն Հայաստանի վրա և կհայտարարեն, թե Սաֆարովին սպանողը ԱՍԱԼԱ-ից է։