Կպատժվե՞ն արդյոք ՔՊ-ական մարզպետները

Օձունի համայնքապետ Արսեն Տիտանյանը տուժող է ճանաչվել՝ Լոռու մարզպետարանում իրեն ծեծի ենթարկելու դեպքի առթիվ հարուցված քրեական գործի շրջանակներում։ Այս մասին ԼՈՒՐԵՐ.com-ի հետ զրույցում հայտնեցին ՀՀ գլխավոր դատախազությունից՝ նշելով, որ քրեական գործով այլ կարգավիճակ ունեցող անձինք դեռևս չկան։ Հիշեցնենք, որ հունիսի 22-ին, «Հայաստան» դաշինքն ահազանգ էր ստացել, որ խորհրդարանական արտահերթ ընտրություններում այն համայնքների ղեկավարները, որոնք «Հայաստան» դաշինքի թիմակիցներն են, այդ համայնքներում համայնքապետերին սպառնալիքներով հորդորում են ինքնակամ հրաժարական տալ։ Իսկ ինքը՝ Տիտանյանը, հայտարարել էր, որ իրեն ծեծի ենթարկողների շարքում էր նաև Լոռու մարզպետ Արամ Խաչատրյանը: Մարզպետը այդ մեղադրանքը հերքել է:

Մեկ այլ դրվագ: Կոռուպցիայի կանխարգելման հանձնաժողովը անհամատեղելիության պահանջների առերևույթ խախտման հիմքով վարույթներ է հարուցել Արարատի մարզպետ Ռազմիկ Թևոնյանի և Արալեզ համայնքի ղեկավար Մարտիկ Թևոնյանի նկատմամբ: Վարչական վարույթը հարուցվել է «Հետքի»՝ «Արարատի մարզպետը շարունակում է մնալ «Երասխի գինու գործարան» ՍՊԸ-ի տնօրենը» վերնագրով հոդվածի հիման վրա: Ռազմիկ Թևոնյանի նկատմամբ վարույթը հարուցվել է հունիսի 18-ին, իսկ Մարտիկ Թևոնյանի նկատմամբ՝ հունիսի 22-ին: «Հետքը» գրել էր, որ Ռազմիկ Թևոնյանը Արարատի մարզպետի պաշտոնը ստանձնել է 2020թ. դեկտեմբերի 10-ին: Մարզպետ նշանակվեուց առաջ Ռ. Թևոնյանը եղել է «Երասխի գինու գործարան» ՍՊԸ-ի տնօրենը, սակայն պետական ռեգիստրի տվյալների համաձայն՝ մարզպետը դեռ շարունակում է լինել գործարանի տնօրեն, թեև օրենքը համատեղելիությունն արգելում է: Ի դեպ, գործարանի տնօրենի պաշտոնը Արարատի ներկայիս մարզպետը զբաղեցնում է 2004թ.-ից:

Ինչպես տեսնում ենք՝ երկու դեպքում էլ գործ ունենք ակնհայտ խախտումների հետ, մի դեպքում քրեական գործի շրջանակներում, մյուս դեպքում կոռուպցիայի դեմ պայքարի: Երկու դեպքում էլ թիրախում ՔՊ-ական մարզպետներն են և սա բավական լավ առիթ է գործող իշխանությունների համար ապացուցելու՝ ինչն է իրենց համար առավել կարևոր՝ օրենքը, թե յուրայիններին ջրից չոր հանելը: Եթե ՔՊ-ական մարզպետները այս անգամ էլ ջրից չոր դուրս գան, դա կնշանակի, որ հեղափոխական թիմը հրաժարվել է հեղափոխության արժեքներից և շարունակում է նախկինների ավանդույթները...