Այսօր ծնվել է ամենայն Հայոց Կաթողիկոս Վազգեն Առաջինը

Այսօր Հայ առաքելական եկեղեցու 130-րդ Կաթողիկոս Վազգեն Առաջինի ծննդյան օրն է (1908-ի սեպտեմբերի 20): Վեհափառը ծնվել է Ռումինիայի մայրաքաղաք Բուխարեստում: Մասնագիտացել է մանկավարժության և փիլիսոփայության մեջ։ 1943 թվականին ստացել է վարդապետի կոչում, իսկ 1951-ին՝ եպիսկոպոսի։

1955-ին Էջմիածնում գումարված ազգային-եկեղեցական ժողովին ընտրվել է Ամենայն հայոց կաթողիկոս։

Իր կաթողիկոսության տարիներին նա ծավալել է հայրենանվեր ու ազգանվեր գործունեություն: Դեռևս 1988-ի փետրվարի 25-ին Արցախը Հայաստանի հետ վերամիավորելու հարցով դիմել է ԽՍՀՄ նախագահ Մ. Գորբաչովին, Արցախյան շարժման ընթացքում խորհրդային և միջազգային ամենաբարձր ատյաններում լսելի է դարձրել արցախահայության ձայնը: Հայրապետական առանձին տնօրինությամբ վերահաստատել է Հայ եկեղեցու Արցախի թեմը (1989), ձեռնարկել Արցախի մի շարք եկեղեցիների ու վանքերի վերաբացումն ու վերանորոգումը:

Վեհափառ հայրապետի շնորհիվ փրկվել ու Երևանի Մատենադարանին են հանձնվել «Վեհափառի» և «Վեհամոր» անուններով կնքված երկու Ավետարանները, Թորոս Ռոսլինի ծաղկած «Զեյթունի Ավետարանը» և «Մալաթիայի Ավետարանը»,Թովմա Արծրունու «Պատմություն Արծրունյաց տան» աշխատության պահպանված միակ ձեռագիր օրինակը և բազմաթիվ այլ ձեռագրեր, արժեքավոր վավերագրեր:

ԽՍՀՄ փլուզումից հետո նա լայն գործունեություն ծավալեց Հայ Առաքելական Եկեղեցու Էջմիածնի և Կլիկիո ճյուղերի միավորման համար:

Մահացել է 1994թ թվականին: