Լեհաստան. Սաֆարովի գործով բանակցություններ չեն անցկացվել Հունգարիայի հետ

Ադրբեջանի նախագահի կողմից ցմահ բանտարկության դատապարտված Ռամիլ Սաֆարովին ներում շնորհելը քննարկման առարկա չէ ԵՄ «Արևելյան հարևանություն» ծրագրի շրջանակներում, որի անդամներ են հանդիսանում Հայաստանը և Ադրբեջանը. Regnum-ի թղթակցին երեկ հայտնել են Լեհաստանի ԱԳՆ-ից։

Regnum-ը ԱԳՆ-ին հարց էր հղել այն մասին, թե արդյոք Լեհաստանը Հունգարիայի հետ քննարկել կամ քննարկելու է Սաֆարովին Ադրբեջան արտահանձնման հարցը, և արդյոք Լեհաստանը, լինելով «Արևելյան հարևանության» ծրագրի նախաձեռնող, որի անդամներն են նաև Հայաստանը և Ադրբեջանը, պատրաստվում է հանդես գալ Սաֆարովին ներում շնորհելու հարցով։

Լեհաստանի ԱԳՆ-ի պատասխանում նշվում է. «Հայտնում ենք Ձեզ, որ Լեհաստանի ԱԳՆ-ը Ռամիլ Սաֆարովի գործով բանակցություններ չի անցկացրել Հունգարիայի հետ։ Ձեր կողմից նշված հարցը «Արևելյան հարևանության» երկրների համագործակցության շրջանակներից դուրս է»։

Նշենք, որ Լեհաստանը 2012 թվականին սկսել է նախագահել Վիշեգրադյան խումբը, որի անդամներն են Հունգարիան, Սլովակիան և Չեխիան։