Միայն անկախություն ունենալը չի բավականացնում. հիմնականը՝ այդ անկախությունը պահելն ու հզորացնելն է. Արամ Ա. Կաթողիկոս

Կաթողիկոսարանի Facebook-ի էջից տեղեկանում ենք, որ սեպտեմբերի 23-ին Անթիլիասի Մայր Տաճարում Սուրբ և անմահ պատարագի ժամանակ ՀՀ վերանկախացման 21-րդ տարեդարձի առթիվ Հանրապետական Մաղթանք է ուղղել Ն.Ս.Օ.Տ.Տ. Արամ Ա. Մեծի Տանն Կիլիկիո Կաթողիկոսը։

Վեհափառ Հայրապետը Հանրապետական Մաղթանքից հետո ասել է.

«Երկար դարերի տառապանքից ու հալածանքներից հետո 1918-ի Մայիսի 28-ին հայրենի մեր ժողովուրդը կերտեց իր անկախությունը: Դժբախտաբար, կարճ ժամանակ հետո Հայաստանը կորցրեց իր անկախությունը և տասնամյակներ շարունակ ենթակա դարձավ համայնավար վարչակարգին: 1991թ. սեպտեմբերի 21-ին Հայաստանը վերանկախացավ՝ մեր ժողովրդի մարտունակ ոգու և գիտակից հանձնառության շնորհիվ:

Ապա Վեհափառ Հայրապետը ավելացրել է, որ «Միայն անկախություն ունենալը չի բավականացնում. հիմնականը՝ այդ անկախությունը պահելն ու հզորացնելն է: Այժմ Հայաստանը պատկանում է ամբողջ հայությանը, հետևաբար՝ Հայաստանի Հանրապետության հզորացումը յուրաքանչյուր հայի պարտավորությունն է: Հզորացում ասելով՝ մենք հասկանում ենք ժողովրդի ամուր կապվածությունը հայրենիքին: Նրա կենսամակարդակի բարձրացումը, հայ մշակույթի ծաղկումը, պետական կառույցների ամրացումը, Հայաստանի արտաքին հարաբերությունների ծավալումը, հայրենի մեր քաջարի բանակի ամրացումը: Այս բոլորը կարելի է իրագործել մեր բոլորի ամբողջական մասնակցությամբ՝ հայրենաշինության նվիրական գործով»:
Ապա, անդրադառնալով Սիրիայի հայության դիմագրաված դժվարություններին, Վեհափառ Հայրապետը ասել է. «Վերահաստատում ենք մեր կոչը՝ աջակցելու Սիրիայի հայության վերականգնման աշխատանքներին: Սիրիայի հայության տագնապը համազգային հիմնահարց է, որին պետք է հենց այս գիտակցությամբ մոտենալ: Անհրաժեշտ է առանց խտրականության օգնության ձեռք մեկնել Սիրիայի հայությանը հենց այսօր, վաղը կարող է ուշ լինել»:

Ապա' Վեհափառ Հայրապետը հիշել է, որ Սիրիայից որոշ թվով հայ ընտանիքներ են գտնվում Լիբանանում՝ դժվար պայմաններից ելնելով: Նա ասել է. «Սիրիայի հայերը մեր եղբայրներն ու քույրերն են, նրանք մեր հյուրերը չեն: Այս գիտակցությամբ պետք է մոտենանք նրանց և մեր տների, ակումբների, եկեղեցիների, աշխատավայրերի դռները պետք է լայնորեն բացենք նրանց առջև՝ նրանց օգտակար լինելու բարձր աստիճանի նախանձախնդրությամբ: Վստահ ենք, որ նրանք ժամանակավորապես պետք է հաստատվեն Լիբանանում և Սիրիայի դրությունը հանդարտվելուն պես կվերադառնան իրենց տներին ու աշխատանքներին՝ մասնակից դառնալու Սիրիայի հայության վերականգնման ու վերակազմակերպման աշխատանքներին»:

Իր խոսքի ավարտին, Վեհափառ Հայրապետը կոչ է ուղղել Լիբանանի թեմի Առաջնորդ Սրբազանին, Ազգային Իշխանության ու բոլոր կազմակերպություններին՝ «առավելագույն չափով օգտակար լինելու Սիրիայի մեր ժողովրդի զավակներին»: