Գիտության և կրթության հայկական ազգային հիմնադրամն այսօր սկսեց իր ֆորումը

Գիտություն և կրթության հայկական ազգային հիմնադրամն այսօր սկսեց իր ֆորումը ԳԱԱ-ում:

Ֆորումի բացմանը ներկա էր նաև վարչապետ Տիգրան Սարգսյանը, ՀՀ-ում ԱՄՆ դեսպան Ջոն Ա. Հեֆերնը, ինչպես նաև՝ ԿԳ նախարար Արմեն Աշոտյանն ու Սփյուռքի նախարար Հրանուշ Հակոբյանը:

Վարչապետն իր խոսքում  նշեց, որ կառավարությունը կարևորում է ԳԿՀԱՀ-ի կազմակերպած համաժողովի գործունեությունը և ողջունեց բոլոր մասնակիցներին:

«Հայ առաքելական եկեղեցու ԱՄՆ-ի Արևելյան թեմի Հայ օգնության ֆոնդն իր 24-ամյա պատմության ընթացքում բազմաթիվ ազգօգուտ ծրագրեր է իրականացրել»,-նշեց վարչապետը՝ մաղթելով համաժողովի մասնակիցներին աշխատանքային հաջողություններ:

Նշենք, որ ԳԿՀԱՀ-ը ստեղծվել է 2000թ.: Հիմնադրամի առաջին մարցանակաբաշխությունն անց է կացվել 2001 թվականին: Յուրաքանչյուր մասնակցի գումարը 5000 ԱՄՆ դոլարին համարժեք ՀՀ դրամ է, որը շնորհվում է նախապես հայտարարված մրցույթին մասնակցած և շահած գիտնականներին:

2012-ին ԳԿՀԱՀ հետազոտական խորհրդին ներկայացված 198 գիտական առաջարկներից գերազանց գնահատական է ստացել 51 գիտական աշխատանք, հաղթող են ճանաչվել 25-ը: Գիտական խմբերի ղեկավարներից տասը կանայք են, իսկ 15-ը՝ տղամարդիկ: Հաղթող թեմաներից 10-ը եղել է ֆիզիկայի, երեքը՝ աստղագիտության, երեքը՝ կենսաքիմիայի, երկուսը՝ կենսաբանության, երկուսը՝ մոլեկուլյար կենսաբանության, մեկը՝ բժշկագիտության, մեկը՝ ճարտարագիտության և նոր տեխնոլոգիաների, մեկը՝ էլեկտրոնիկայի, մեկը՝ կենսաբանության և մեկը՝ հայագիտության ոլորտներից:

Ընդհանուր առմամաբ՝ անցած տասներկու տարիներին ՀՕՖ-ի գիտական այս ծրագրի մրցանակին է արժանացել 281 գիտական խումբ: Ծրագրի դրամաշնորհային գումարը կազմում է 1մլն 405 հազար դոլար: