Արդյո՞ք քրեական գործեր կհարուցվեն Նիկոլ Փաշինյանի թիմակիցների հանդեպ

Վարչապետ Նիկոլ Փաշինյանի լուսանկարի տակ վիրավորանք պարունակող գրառում կատարելու փաստի առթիվ հարուցվել է քրեական գործ՝ ՀՀ քրեական օրենսգրքի 137.1-րդ հոդվածի 2-րդ մասի 2-րդ կետով՝ անձի հանրային գործունեությամբ պայմանավորված՝ նրան ծանր վիրավորանք հասցնելու հատկանիշներով։ Ուշագրավը, սակայն, այն է, որ հենց նույն օրը Փաշինյանի թիմակից Մեղրու քաղաքապետի ԺՊ-ն համացանցում լկտի պահվածք է դրսևորում և վիրավորում քաղաքացիներին, ընդ որում՝ հրապարակավ:

Եվ սա, իհարկե, եզակի դրվագ չէ ՔՊ-ական պաշտոնյաների կողմից: Ավան վարչական շրջանի ղեկավարի տեղակալ Ներսես Պողոսյանը Ֆեյսբուքի իր էջում գրել էր. «Հատուկ թերհասների համար! Հայկ և Նաիրի Սարգսյաններն իմ ընկերներն են։ Ու են որ Հայկը խախտել էր պարետի որոշումը (որի համար տուգանվել է) ձեզ իրավունք չի տալիս ավել պակաս հաչալու։ Ձեզ էլ եմ հասկանում ո՞նցա կարելի Սևան գնալ ու հասարակ լողափին ժողովրդի հետ ուրախանալ, առանց հաստավզերի, առանց կոկայինի, առանց մի քանի միլիոն դոլարներ կրվելու։ Ախր շատ հարամ ենք է, ամեն ինչ փոխում ենք։Ապրե'ք ձեր կյանքով ճնճղուկներ»: Դրանից հետո էլ պատերազմի ամենաթեժ օրերին պաշտոնյան սպառնում էր գեներալ Վիտալի Բալասանյանին:

Լենա Նազարյանը կապիտուլյացիոն խայտառակ ակտի ստորագրումից հետո՝ նոյեմբերի 25-ին, իր ֆեյսբուքյան էջով տարածում էր Փաշինյանի աջակիցների՝ սեռական հայհոյանք և սպառնալիքներ պարունակող տեսանյութերը` ուղղված,  իհարկե, Փաշինյանի ընդդիմախոսներին:

Նիկոլ Փաշինյանի քավորի՝ Տավուշի մարզպետ Հայկ Ղալումյանի եղբայրը՝ «Քաղաքացիական պայմանագիր» կուսակցության ցուցակով պատգամավոր ընտրված Վահե Ղալումյանը, ով իր ֆեյսբուքյան անձնական էջում սահմանափակել է մեկնաբանությունների դաշտը, լրատվականների նյութերի տակ իր հասցեին քննադատություն հնչեցրած օգտատերերին անձնական նամակներով  հայհոյանքներ է գրել։ 

Հետաքրքիր է՝ իրավապահները իսկապես չեն նկատո՞ւմ իշխանական պաշտոնյաներին նման պահվածքը և նրանց կողմից թույլ տված օրենքի խախտումները, թե իրավիճակ է փոխվել, և իշխանության ներկայացուցիչները արտոնյալ են նաև հայհոյելու հարցում...