Նախկինների կադրի «չեզոք» համակրանքը ՔՊ-ի հանդեպ

Հայաստանում սկիզբ առած համայնքների խոշորացման արդյունքում մի շարք համայնքներում 25, 30, ընդուպ 38 գյուղ է ընդգրկվելու, մեկ համայնքապետը երեք տասնյակ համայնք է ղեկավարելու։ Դրանցից մեկն Աշտարակն է, որի կազմում խոշորացումից հետո 30 համայնք է մտնելու։ Աշտարակի գործող քաղաքապետն անկուսակցական, նախկինների աջակցությամբ ընտրված Թովմաս Շահվերդյանն է, որը քաղաքը ղեկավարում է 2016-ի հոկտեմբերից։

Ուշագրավն այն է, որ Շահվերդյանը հայտարարում է, որ վերջին ընտրությունների ժամանակ չեզոք դիրք է գրավել, սակայն, ավելի շատ աջակցել է ՔՊ-ին: Ի դեպ, մամուլում նաև շատ էր գրվել այն մասին, որ Շահվերդյանը մտերիմ հարաբերություններ է հասցրել հաստատել նաև ՔՊ-ական մարզպետի հետ: Ինչ է սա, եթե ոչ նախկիններ-ներկաներ համագործակցության շատ ճկուն օրինակ: Տպավորություն է, որ նախկին իշխանությունների օգնությամբ յուղոտ պաշտոնների հասած երիտասարդ պաշտոնյաները աշխատում են՝ որտեղ տաք էնտեղ կաց սկզբունքով, և շատ արագ մոռանում են այն քաղաքական ուժերին, որոնց շնորհիվ էլ քաղաքական ասպարեզում են հայտնվել: Երեկ ՀՀԿ-ի համար էին լոբբինգ անում, այսօր՝ ՔՊ-ի: Իրավիճա՞կ է փոխվել, այս հարցում, կարծես թե, ոչ: