Այսօր Դմիտրի Շոստակովիչի ծննդյան օրն է

«Շոստակովիչի երաժշտությունը կարծես վերածնում է մարդուն, նրան լիցքավորում նոր ուժով ու եռանդով»: Այսպիսի կարծիք է հայտնել 
գրող Մարիետա Շահինյանը ռուս կոմպոզիտոր, դաշնակահար, ԽՍՀՄ ժողովրդական արտիստ Դմիտրի Շոստակովիչի մասին, ում ստեղծագործությունը XX դարի երաժշտական արվեստի գագաթներից է: 

Դմիտրի Շոստակովիչը ծնվել է 1906թ. սեպտեմբերի 25-ին։1923-ին ավարտել է Պետրոգրադի կոնսերվատորիայի դաշնամուրի, 1925-ին՝ ստեղծագործական բաժինները: Ավարտական քննությանը ներկայացրել է իր Առաջին սիմֆոնիան, որը հեղինակի հազվագյուտ տաղանդի և վարպետության վկայությունն է: 1927-ին Վարշավայում դաշնակահարների՝ Շոպենի անվան միջազգային 1-ին մրցույթում ստացել է պատվավոր դիպլոմ: 

Շոստակովիչը բազմիցս եղել է Հայաստանում. 9-րդ և 10-րդ կվարտետները, «Համլետ» ֆիլմի երաժշտությունը գրել է Դիլիջանում՝ կոմպոզիտորների ստեղծագործական տանը: Իր հոդվածներում հաճախ է անդրադարձել հայկական երաժշտության զարգացման խնդիրներին և հայ կոմպոզիտորների ստեղծագործություններին: Շոստակովիչին աշակերտել են կոմպոզիտորներ Կարեն Խաչատրյանը և Ղազարոս Սարյանը:

Դ. Շոստակովիչի կիսանդրին Սանկտ Պետերբուրգում
(1997 թ., քանդակագործներ` Ալեքսանդր և Սերգեյ Չեռնիցկիներ)