ՀՀԿ-ական քաղաքապետն Արտաշատը «հանձնեց» ՔՊ-ին. ի՞նչ են խոստացել Կարեն Բենիամինյանին

Արտաշատ համայնքի ղեկավար Կարեն Բենիամինյանը երեկ հայտարարություն էր տարածել, որում նշվում էր, որ վայր է դնում քաղաքապետի իր լիազորությունները և զբաղվելու է այլ աշխատանքով: 

Մինչ այս մամուլը բազմիցս էր գրել, որ Բենիամինյանը քաղաքական կրոնափոխության ճանապարհն է բռնել: Տեղեկություններ կան, որ Բենիամինյանն ու մարզպետ, «ՔՊ» անդամ Գարիկ Սարգսյանը մտերմացել են, եւ այդ հողի վրա Գազի Հովոյի սանիկ, ՀՀԿ-ական քաղաքապետ Բենիամինյանը հեղափոխական փոփոխություններ է իրականացրել իր ներսում եւ քաղաքապետարանում։ Նա քաղաքապետի տեղակալի պաշտոնից ազատել է իր կարատեիստ ընկերոջը՝ Ռոբերտ Ծատուրյանին, ով ժամանակին եղել է Հովիկ Աբրահամյանի թիկնապահը, եւ նրա փոխարեն նշանակել Արտաշատի նախկին քաղաքապետ Գագիկ Մուրադյանի ավագանու անդամ որդուն՝ Սերգեյ Մուրադյանին։ Վերջինս մի խմբի հետ վերջին շրջանում բոյկոտում էր ավագանու նիստերը։

Հիմա էլ Բենիամինյանը լուռ հեռանում է՝ հնարավորություն ընձեռելով ՔՊ-ին Արտաշատ համայնքի ղեկավարի ՔՊ-ական ԺՊ նշանակել, Բենիամինյանը Արտաշատը փաստացի հանձնում է իշխանություններին, քանի որ ինքը ամեն դեպքում համարվում էր ընդդիմադիր պաշտոնյա: Իսկ այս հաջողված գործարքի դիմաց Բենիամինյանը նոր յուղոտ պաշտոն կստանա ՔՊ-ից: Արդեն իսկ խոսվում է, որ նա նշանակվելու է Արտաշատի ՋԸՕ գործադիր տնօրեն: Ահա այսպիսի համագործակցային հարաբերություններ են հաստատվել այսպես կոչված` նախկինների և ներկա իշխանությունների միջև...անգամ նախանձել կարելի է: