Fact Check. Քերոբյանի հաշվարկներում «օդից» վերցրած թվեր են

«Հաշվարկված է, որ կապի ապաշրջափակման արդյունքում 2 տարում Հայաստանի ՀՆԱ-ն 30 տոկոս աճ կարձանագրի։ Սա ոչ միայն հայկական կողմի, այլև Համաշխարհային բանկի և Ասիական զարգացման բանկի ուսումնասիրությունների արդյունքն է»,- այս մասին հայտարարել է Էկոնոմիկայի նախարար Վահան Քերոբյանը:

Սակայն, ուշագրավ է, որ վերը նշված ուսումնասիրությունների մասին, չգիտես ինչու, տեղյակ է միայն ինքը՝ Քերոբյանը, իսկ լայն հասարակությանը այն մանրամասն չի ներկայացվել: Ճանապարհների ապաշրջափակումը, անշուշտ, դրական գործոն է տնտեսության համար։ Բայց միայն դա շատ քիչ է տնտեսության զարգացման և ՀՆԱ աճի, այն էլ՝ 2 տարվա ընթացքում հայտարարվող 30 տոկոս աճի համար։ Անկախ նրանից, թե ինչ կասեն միջազգային կազմակերպությունների ու իշխանությունների ուսումնասիրությունները, եթե, իհարկե, այդպիսի ուսումնասիրություններ իրականում կատարվել են և կատարվել են այսօրվա իրողությունների հիման վրա, միանշանակ է, որ մեր տնտեսությունը պատրաստ չէ դրան։ Ճանապարհների ապաշրջափակումը ոչինչ է, եթե տնտեսությունը չունի պոտենցիալ, որը պատրաստ է առաջարկել արտաքին շուկաներին։

Ստացվում է, որ նախարարը պարզապես մանիպուլացնում է հանրային կարծիքը՝ չունենալով իր նշված թվերի որևէ իրական ապացույց և հաշվարկ: