Ի՞նչ «միջանցք» է բացել ադրբեջանցիների համար ընդահատակ անցած Տաթևիկ Ռևազյանը

Հոկտեմբերի 6-ից Ադրբեջանի ավիաուղիներն սկսել են օգտագործել Հայաստանի օդային տարածքը Բաքվից Նախիջևան ուղեւորափոխադրումներ իրականացնելու համար, հայտնում է «ՌԻԱ Նովոստի»-ն` վկայակոչելով ադրբեջանական AZAL ավիափոխադրողի` չորեքշաբթի օրվա հաղորդագրությանը:

Հաղորդագրության մեջ նշվում է, որ դա «ցույց է տալիս Ադրբեջանի վճռական պատրաստակամությունը` ապաարգելափակելու տրանսպորտային հաղորդակցությունները տարածաշրջանում, ինչը համապատասխանում է սահմանամերձ բոլոր երկրների շահերին»:

Չգիտես ինչու, այն մասին, որ ՀՀ օդային տարածքը բացվել է թշնամի երկրի համար՝ հայ հասարակությունը իմանում է ոչ թե ՀՀ քաղավիացիայի կոմիտեից, այլ հակառակորդի պատկան մարմինների ռելիզներից: Քաղավիացիայի կոմիտեն՝ իր ղեկավար Տաթևիկ Ռևազյանով հանդերձ, ընդհատակ է անցել և տպավորություն է, որ կա՛մ չի տիրապետում իրավիճակին, կա՛մ չի ցանկանում որևէ բացատրություն տալ, թե այդ ինչ հիմքով են թուրք-ադրբեջանական օդանավերը անցնում ՀՀ օդային տարածքով: Աբսուրդ է պատկերացնելը, որ այս ամենի մասին կոմիտեում տեղյակ չեն, հետևաբար ստացվում է, որ պարզապես գործընթացներ են տեղի ունենում, որոնց նպատակը ՀՀ քաղաքացիների մեջքի հետևում հերթական գաղտնի ու մութ գործարքներ կնքելն է: 

Եթե խոսք գնար լոուքոսթերներ Հայաստան բերելու և դեպի Միլան էժան ավիատոմսի հնարավորություն ընձեռելու մասին՝ կոմիտեն արդեն մի քանի ասուլիս էր տվել և հնարավորինս փիառվել, իսկ այժմ քար լռություն է: Ստացվում է՝ Տաթևիկ Ռևազյանը արդեն մեկ միջանցք Ադրբեջանին տրամադրել է՝ ՀՀ օդային միջանցքը: