Բաբկեն Թունյանի ուշագրավ «ինքնախոստովանությունը»

«Հայրենիքը կադաստրային արժեքներով չեն չափում, որևէ մեկը նման պնդում չի արել», - խորհրդարանական ճեպազրույցների ժամանակ հայտարարեց ԱԺ ՔՊ խմբակցության պատգամավոր Բաբկեն Թունյանը՝ պատասխանելով հարցին, թե կարելի՞ է արդյոք հայրենիքը, հայրենիքի քաղաքները «կադաստրային արժեքով», շենք-շինություններով գնահատել և համարել, որ եթե Շուշիում բնակելի շենք չի կառուցվել, ուրեմն այն կարելի է հանձնել, կամ օրինակ, եթե Չարենցավանում բնակելի նոր շենք չի կառուցվել, Չարենցավանը հանձնելու վտանգ կա։

«Որևէ մեկը նման պատկերացում չունի հայրենիքի մասին», - շարունակեց Թունյանը։ Նա կարծիք հայտնեց նաև, որ հայրենիքը միայն ելույթներով, կենացներով չեն սիրում։

«Հայրենիքը սիրելն արտահայտվում է նաև այդ հայրենիքն ավելի բարեկեցիկ դարձնելով, ինչը չափվում է որոշակի ցուցանիշներով, այդ թվում՝ ներդրումների չափերով, կադաստրային արժեքներով և այլն», - ասաց ՔՊ խմբակցության պատգամավորը։

Եթե Թունյանի տրամաբանությամբ շարժվենք` ցուցանիշներն ու ներդրումների չափերն իշխանությունների ապահովման տիրույթում են: Այսինքն` հենց իրենք՝ իշխանությունները, պետք է ապահովեն այդ ցուցանիշների բարձր մակարդակը և ներդրումների կայուն հոսքը: Եթե նայենք Հայաստանի տնտեսական ցուցանիշներին` դրանք, առնվազն ներդրումների մասով, վերջին տաս տարիների ամենատխուր ցուցանիշներն են: Գաղտնիք չէ, որ արտասահմանյան ներդրումների ծավալները շեշտակի կրճատվել են: Մյուս ցուցանիշները նույնպես աչք չեն շոյում՝ չկա տնտեսական երկնիշ աճը, որը խոստացել էր էկոնոմիկայի նախարարը, տնտեսության հիմնական ճյուղերում անկում է:  Ստացվում է, որ եթե հայրենիքի սիրելու չափանիշ ենք համարում այս ասպեկտները, ապա Թունյանը ընդունում է, որ իրենք՝ օրվա իշխանությունները, հայրենիքը չեն սիրում, որովհետև չեն ապահովել ո՛չ բարեկեցություն, ո՛չ դրական ցուցանիշներ, ո՛չ հսկայական ներդրումներ: