Հերթական «փուչիկը». ո՞ւմ կենսաթոշակն է ավելանալու հունվարի 1-ից

Կառավարությունը հպարտորեն հայտարարում է, որ 2022-ի հունվարի 1-ից բարձրացվելու են կենսաթոշակները: Այս ավետիսը կառավարության կողմից ներկայացվում է իբրև մեծագույն աշխատանք, որը կատարվել է իրենց կողմից՝ բյուջեի սուղ միջոցները խնայելու արդյունքում և միտված է տատիկ-պապիկների ապացուցելու, որ ապագա, ամեն դեպքում, կա:

Մինչ տատիկ-պապիկները հավատացել էին, որ ապագան ի վերջո եկել է նաև իրենց դուռը, պարզ դարձավ, որ գործ ունենք հերթական մանիպուլյացիայի հետ: Իսկ մանիպուլյացիան կայանում է նրանում, թե ինչպես է կառավարության կողմից ներկայացվում կենսաթոշակների բարձրացման լուրը: Բանն այն է, որ այդ բարձրացումը վերաբերվում է ոչ բոլորին, միայն նրանց, ով ընդհանրապես չի աշխատել, այսինքն՝  փաստացի այս երկրի համար ոչինչ չունի արած: Արդյունքում` ունենք պատկեր, երբ 2 հազար 100 դրամով ավելի թոշակ ստացողների թիվը բավականին քիչ է՝ մոտ 12-15 հազար շահառու կա, մինչդեռ Հայաստանում կա ավելի քան 460 հազար կենսաթոշակառու։ Ստացվում է կառավարությունը 12-15 հազար մարդու թոշակ է բարձրացնելու, այն էլ նրանցը, ովքեր, ըստ էության, պարապության են մատնված եղել, սակայն փիառն ու աղմուկը՝ 460 հազարի է: