Fact check. ո՞ւր են «հորդում» Վահան Քերոբյանի խոստացած ներդրումները

Վերլուծական 14 Հոկտեմբեր, 2021 23:13

Վիճակագրական կոմիտեն հրապարակել է 2021 թվականի առաջին կիսամյակում (հունվար-հունիս) Հայաստանում կատարված օտարերկրյա ներդրումների տվյալները: 2021 թվականի առաջին կիսամյակում Հայաստանում օտարերկրյա ներդրումների վիճակագրությունը բոլորովին ոգևորիչ չէ. ընդհանուր ներդրումները դեռևս չեն վերադարձել նախաքովիդյան 2019 թվականի մակարդակին: Ավելին՝ խիստ սահմանափակ է երկրների ցանկը, որոնց կարելի է համեմատաբար խոշոր ներդրողներ համարել Հայաստանում. դրանք հիմնականում Ռուսաստանն ու Գերմանիան են:

Ուշագրավ է, որ ամիսներ առաջ նախարար Վահան Քերոբյանը հետևյալ գրառումն էր արել: «Երկնիշ տնտեսական աճն, իհարկե, լինելու է, Հայաստանն արդեն շինհրապարակ է, գյուղատնտեսությունը վայելում է մասշտաբային օժանդակություն, ներդրումները հորդում են, աշխատատեղերն ավելանում»:

Արդյունքում, սակայն, ունենք մի իրավիճակ, երբ այս տարվա վեց ամիսներին կան երկրներ, որոնք իրենց ուղղակի ներդրումները հանել են երկրից։ Հայաստանից Ֆրանսիայի արտահանած կապիտալը կազմել է 5 մլրդ 15 մլն դրամ։ Իտալիան նվազեցրել է ուղղակի ներդրումների ծավալները։ Օրինակ՝ Վրաստանը 4.5 մլն դրամի չափով իր կապիտալը դուրս է հանել Հայաստանից։ Ռուսաստանի Դաշնությունն էլ է նվազեցրել ուղղակի ներդրումները։ Ռուսական ներդրումների ծավալները Հայաստանից արտահանվել են. անցյալ տարվա ընթացքում Հայաստանից Ռուսաստանի արտահանած ուղղակի ներդրումների չափը կազմել է 9 մլրդ 379 մլն դրամ, իսկ ահա, 2020 թվականի նույն ժամանակահատվածում Ռուսաստանից արտահանված ուղղակի ներդրումները կազմել են 22 մլրդ 172 մլն դրամ։

Թե որտեղ է այստեղ Քերոբյանի նշած բումը և հորդացող ներդրումները՝ դժվար է ասել: Ինչպես երևում է՝ վիճակագրական կոմիտեն հերթական անգամ անհարմար դրության մեջ է դնում էկոնոմիկայի նախարարին: