Fact check. հերթական քայլը՝ ժողովրդի թիկունքում. ի՞նչ հուշագիր է ստորագրել հայկական կողմը

Սոցցանցերում շրջանառվում է «Գորիս-Դավիթ Բեկ-Կապան-Ճակատեն ճանապարհով քաղաքացիների ազատ տեղաշարժման մասին» հուշագրի պատճենը, որի կետերից մեկի համաձայն՝ ադրբեջանական կողմն «իրացնում է ճանապարհի տվյալ հատվածի օգտագործման իր իրավունքը: ՀՀ կառավարությունը, ի պատասխան մի շարք ԶԼՄ-ի հարցումների, լղոզված պատասխան է տվել` փաստացի ոչ հերքելով, ոչ հաստատելով տվյալ փաստաթղթի առկայությունը: Կասկածից վեր է, որ եթե շրջանառվող համաձայնագիրը կեղծ լիներ՝ կառավարությունը արդեն իսկ աղմուկ էր բարձրացրել և բոլոր ֆրոնտերով հերքել տարածվող լուրերը: Նման հերքման բացակայությունն  էլ հիմք է տալիս ենթադրելու, որ համաձայնագիր ամեն դեպքում գոյություն ունի, այսինքն՝ հերթական անգամ հպարտ քաղաքացիների թիկունքում մութ գործարք է կնքվել, որի մասին այդ հպարտ քաղաքացիները մինչ օրս ոչինչ չգիտեն, բացի համացանցում տարածվող համաձայնագրի լուսանկարներից:

Ստացվում է, որ բոլոր այն պաշտոնյաները, ովքեր այս ողջ ընթացքում պնդում ու հայտարարում էին, որ նոյեմբերի 9-ի համաձայնագրից զատ այլ փաստաթուղթ չկա՝ ստում էին: Նման հայտարարություններ արել են վարչապետը, փոխվարչապետը, ՔՊ-ական պատգամավորները, մարզպետները:Անցյալ տարվա դեկտեմբերի 9-ին ԱԺ-ում «Լուսավոր Հայաստանից» Գուրգեն Բաղդասարյանը հետաքրքրվեց, թե նոյեմբերյան եռակողմ հայտարարությունից բացի կա արդյոք հավելված, ինչին Նիկոլ Փաշինյանը արձագանքեց.

«Որեւէ հավելված, այլ փաստաթուղթ եւ այլն, էդպիսի բան գոյություն չունի»: 

Սյնուհետև դեկտեմբերի 19-ին ՀՀ ՊՆ-ն հայտարարեց, թե Սյունիքի մարզի Գորիս-Կապան ավտոճանապարհի 21 կմ հատվածը որոշ տեղերում անցնում է վիճարկելի տարածքով: Ըստ ՊՆ-ի՝

1. Համաձայն ձեռք բերված պայմանավորվածության՝ Գորիս-Դավիթ Բեկ ճանապարհային հատվածում երթեւեկության անխափանության նկատառումներով տեղակայվում են ռուս սահմանապահ ուժեր։
2. Գորիս-Կապան ավտոճանապարհի 21 կմ երկարությամբ հատվածի անվտանգությունը, որն անցնում է վիճարկելի տարածքով, կապահովվի ռուս սահմանապահների միջոցով։
3. Շփման գծի մի կողմում կտեղակայվեն ՀՀ սահմանապահ զորքեր՝ Հայաստանի կողմից, Ադրբեջանի սահմանապահ զորքերը՝ Ադրբեջանի կողմից:
4. Նշված ճանապարհահատվածի անվտանգությունն ապահովելու նպատակով ձեռնարկվելու են անհրաժեշտ համալիր միջոցառումներ:

ՊՆ-ի այս հայտարարությունը համընկնում է հուշագրում սահմանվածին:

Ըստ էության, հենց սա է այն փաստաթուղթը, որով ամրագրվել է պատերազմական գործողությունների ավարտից հետո հայկական ուժերի դուրսբերումը վերջիններիս վերահսկողության տակ մնացած Ղուբաթլուի եւ Զանգելանի շրջանների մի մասից: Դրանում ամրագրվել է նաեւ Սյունիքի որոշ ճանապարհների վերահսկողության կարգը: