ՔՊ-ական պատգամավորը բացահայտել է Նիկոլ Փաշինյանի սուտը

Իշխող խմբակցության պատգամավոր Գագիկ Մելքոնյանը խորհուրդ է տալիս Ռուսաստանի դեսպանատնից պարզել՝ ինչու է Արցախում իրավիճակը լարվել: «Գնացեք Ռուսաստանի դեսպանատուն, ասեք` դուք երաշխավորում եք, ինչի՞ սենց եղավ», - «Ազատության» հետ զրույցում նշել է նա:

Վարչապետ Փաշինյանի թիմակիցը զարմացել է, թե ինչու են իշխանությանը հարց տալիս Արցախի անվտանգության մասին, ասել է՝ Արցախի անվտանգության երաշխավորը Ռուսաստանն է. «Ղարաբաղի անվտանգությունն իրենք են, երաշխավորը ռուսներն են անվտանգության: Այս հարցերը պիտի ռուսներին տանք, թե ինչի սենց եղավ»:

Մինչդեռ նոյեմբերի 10-ի հայտարարությունից հետո, երբ Ղարաբաղում սահմանի պաշտպանությունն անցավ ռուս խաղաղապահներին, վարչապետ Փաշինյանը վստահեցնում էր, թե Արցախի անվտանգության երաշխավորը շարունակելու է Հայաստանը լինել։

Ի՞նչ է ստացվում` իրավիճա՞կ է փոխվել, ինչպես կասեին իշխանությունները, թե՞ Մելքոնյանը բացահայտում է, որ Փաշինյանը ժամանակին սուտ ու պոպուլիստական  հայտարարություններ է արել: Կամ ինչ-որ մի պահից սկսած Հայաստանը դադարել է լինել Արցախի անվտանգության երաշխավորը, սակայն, հանրությանն այդ մասին տեղյակ պահել հարկ չեն համարել: Իսկ գուցե Մելքոնյանն ի՞նքն է փորձում սրբագրել իր թիմի ղեկավարին և իշխանությունների անճարության, անգործության մեղքն այսպես ասած՝ գցել ռուսների գրպանը:

Ամեն դեպքում, եթե անգամ շարժվենք Մելքոնյանի տրամաբանությամբ, ապա միևնույն է` հարցեր են առաջանում: Այդ հարցերը, մասնավորապես, կապված են Սյունիքի հետ, ի վերջո Սյունիքի անվտանգության երաշխավորն էլ ՔՊ-ն է, ո՞ւմ հարցնենք, թե ինչու այդպես եղավ, գուցե նորից ռուսների՞ն ...