Իշխանությունը «ձեռքերը լվացել է» հայ ռազմագերիներին վերադարձնելուց

Հայաստանում Ռուսաստանի դեսպան Սերգեյ Կոպիրկինը երեկ ուշ երեկոյան «Էրեբունի» օդանավակայանում դիմավորել է վայրէջք կատարած ռուսական օդանավին, որը հայրենիք է հասցրել 5 գերիներին: Այս մասին ասված է երեկ դիվանագիտական առաքելության ֆեյսբուքյան պաշտոնական էջում տեղադրված հաղորդագրությունում։ Բացի Կոպիրկինից՝ գերիներին դիմավորել էին Արցախում ռուս խաղաղապահների նախկին հրամանատարներ Ռուստամ Մուրադովը, Միխայիլ Կոսաբոկովը և ՌԴ խաղաղապահ ուժերի ներկայիս հրամանատար Գենադի Անաշկինը։

Հայաստանյան պաշտոնյաների համար այս իրադարձությունը, թերևս, այնքան էլ կարևոր չէր, և նրանք նախընտրել են ընդհանրապես օդանավակայան չգնալ: Պարզապես խայտառակություն է, որ հայ ռազմագերիներին հայրենիքում դիմավորում են ռուս պաշտոնյաները: Կասկածից վեր է, որ հարցը ոչ միայն քաղաքական, այլ նաև բարոյական հարթության մեջ է. տղաներին հաճելի կլիներ վերադարձից հետո հայրենիքում հանդիպել հայ պաշտոնյաների, իրենց կարևորված զգալ: Սակայն, սա ոչ հանրահավաք է, ոչ էլ ուտել-խմելու տեղ, որ իշխանության ներկայացուցիչները գլխապատառ կերպով նետվեն: Ստացվում է, որ ամեն պատեհ առիթով գերիների վերադարձը կարևորող,  իշխանության ջանքերի մասին խոսացող Փաշինյանն ու թիմակիցները անգամ չեն բարեհաճում դիմավորել այդ գերիներին: Այնպես էլ չէ, որ չգիտեին, առավոտից մամուլը գրում էր, որ Մուրադովը Բաքվում է: Սակայն անգամ գերիների վերադարձից հետո հայկական կողմը պաշտոնական որևէ հայտարարություն չարեց, ինչն ինքնին խոսուն է:

Փաստորեն, իշխանությունները այլևս չեն էլ թաքցնում, որ վերջնական ձեռքերը լվացել են մեր գերիներին հայրենիք վերդարձնելուց և այդ առաքելությունը հանձնել են ռուսական կողմին: