Հունաստանում սկսվել է 24-ժամյա համընդհանուր գործադուլ

Սեպտեմբերի 26-ի առավոտյան Հունաստանում սկիզբ է առել 24-ժամյա գործադուլ. հայտնում է Reuters-ը։

Երկրի աշխատող բնակիչների կեսից ավելիին միավորող երկու խոշորագույն արհմիությունների՝ ADEDY և GSEE կողմից հայտարարված բողոքի ակցիան առաջինն է հուլիսին կոալիցիոն կառավարության՝ իշխանության գալուց ի վեր։ Գործադուլը անց է կացվում` ի նշան բյուջետային տնտեսման նոր միջոցառումների դեմ բողոքի։

Գործադուլի պատճառով սեպտեմբերի 26-ին Հունաստանում չի գործի հասարակական տրանսպորտը՝ Աթենքի մետրոպոլիտենը, միջքաղաքային ավտոբուսային փոխադրամիջոցները և ջրային հաղորդակցությունը։ Երեք ժամով գործադուլին կմիանան ավիակարգավարները, ինչի հետևանքով կխաթարվի օդային հաղորդակցությունը։ Հունական հիվանդանոցները նոր հիվանդներ կընդունեն միայն անհետաձգելի օգնության անհրաժեշտության դեպքում։ Սեպտեմբերի 26-ին Հունաստանում չեն աշխատի խանութների մեծ մասն ու թանգարանները։

Արհմիությունների ղեկավարությունը հույս ունի, որ փողոցներ դուրս կգա մի քանի հարյուր հազար մարդ։ Միայն Աթենքում անվտանգության ապահովմամբ կզբաղվի շուրջ երեք հազար ոստիկան՝ երկու անգամ ավելի շատ, քան սովորաբար։