Սիրիական բանակի գլխավոր շտաբում կռիվներ են սկսվել

Դամասկոսում սիրիական բանակի գլխավոր շտաբում այս չորեքշաբթի սկսվել է կատաղի պայքար. հաղորդում է AFP-ն: Աղբյուրը հաղորդում է, որ վնասներ կրում են երկու կողմերն էլ: Ընդ որում, չի հստակեցվում, թե ովքեր են ընդդիմանում սիրիական բանակին:

Հրաձգությունը սկսվել էր այն բանից հետո, երբ առավոտյան երկու հզոր պայթյուն էր տեղի ունեցել գլխավոր շտաբի շենքի մոտակայքում: Reuters-ը հաղորդում է, որ վնասվել են շտաբի պահակները, իսկ բարձրաստիճան պաշտոնատար անձանցից ոչ ոք չի տուժել:

Մինչ այդ Սիրիայի ազատ բանակի ներկայացուցիչները, որոնք իրենց վրա էին վերցրել ահաբեկչության պատասխանատվությունը, հայտնում են, որ զոհ են գնացել ավելի քան մի քանի տասնյակ մարդիկ. գրում է BBC news-ը: Իշխանություններն իրենց հերթին հայտնում են, որ պայթյունների հետևում կանգնած են«զինված ահաբեկչական խմբավորումները, որոնք կապեր ունեն արտասահմանում. պարզաբանում է Reuters-ը:

Պայթյունները որոտացել են առավոտյան ժամը 7-ի սահմաններում 15 րոպե ընդմիջմամբ: Սիրիայի տեղեկատվության նախարար Օմրան Զուբիի խոսքերով՝ պայթուցիկները եղել են ինքնաշեն:

AFP-ն հայտնում է, որ դեպքի վայրում սպանվել էր իրանցի Press TV-ի լրագրողուհի Մայա Նասերը, ով ժամանել էր դեպքերը լուսաբանելու համար: Հեռուստաընկերությունը հայտնում է, որ նրան սպանել է դիպուկահարը:

Սիրիական զինվորականության ուղղությամբ ահաբեկչության այս  դեպքը  եզակի չէ: Ամենաուժեղ հարվածը  սիրիական բանակին հասցվել էր հուլիսի 18-ին, երբ Դամասկոսի Անվտանգության ծառայության շենքում պայթյունի  հետևանքով  զոհվել  էր 4  բարձրաստիճան պաշտոնյա, այդ թվում՝ Դաուդ  Ռաջիհան: