Սարգսյանի դեմ բողոքող սփյուռքահայերը՝ պահանջատեր, Փաշինյանի դեմ բողոքողները՝ «դեբոշ» անող

Խորհրդարանական ընդդիմության նախաձեռնած, «Հայաստան համահայկական հիմնադրամի» կողմից հավաքագրված եւ ՀՀ պետբյուջե փոխանցված դրամական միջոցների օգտագործումն ուսումնասիրող ԱԺ քննիչ հանձնաժողովի կազմի վերաբերյալ քննարկման ժամանակ այսօր ԱԺ լիագումար նիստում ՔՊ-ական պատգամավոր Վիգեն Խաչատրյանը ելույթի ժամանակ սլաքներն ուղղեց ընդդիմությանը․

«Սփյուռքում լայն կապեր ունեմ։ Անհանգստություն են հայտնում, որ հիմնադրամը վարկաբեկելու քաղաքականություն է վարվում։ Մարդկանց մոտ անվստահություն  է սերմանվում, որ չարժի գումարներ վստահել հիմնադրամին, որովհետեւ չարաշահվում է։ Այ սա ես համարում եմ սրիկայություն։ Ընդդիմության խնդիրն է  խոշորացույցի տակ վերցնել ընդդիմության թերությունները, ինչը ողջունելի է, բայց թացը չորի հետ խառնելը․․․»։

Բացի այդ, ըստ Խաչատրյանի, սրիկայություն է արտասահմանում գտնվող պատվիրակության դեմ դեբոշներ կազմակերպելը: Հիշեցնենք, որ երբ հայ-թուրքական արձանագրությունների ստորագրումից հետո երրորդ նախագահ Սերժ Սարգսյանը սփյուռքի հայ համայնքներ կատարած իր շրջագայության ժամանակ հանդիպել էր անչափ կոշտ ու տեղ-տեղ նաև կոպիտ ընդունելության, այն ժամանակվա ընդդիմությունը գտնում էր, որ դա սփյուռքի իրավունքն է, պահանջատեր են, բորբոքվելու տեղ էլ ունեն: Հիմա, երբ նախկին ընդդիմադիրները եկել են իշխանության, հանկարծ պարզվել է, որ ՔՊ-ական պաշտոնյաների դեմ ցույց անելը քիչ չի դեբոշ է կոչվում, ոչ թե բողոքի ակցիա, այլ մի բան էլ սրիկայություն է: