Հարկատուի բերած, քամու տարած. 140.000 դոլարի «գլուխը» ուտելու նուրբ արվեստը

«Երեւանտրանս» ՓԲԸ կանոնադրական կապիտալում բաժնետոմսերի ձեռքբերման համար քաղաքային բյուջեից հատկացվել է 67.8 մլն դրամ (ավելի քան 140 հազար դոլար): Նախագծով առաջարկվում է 67.8 մլն դրամն ուղղել «Երեւանի ավտոբուս» ՓԲԸ-ի կանոնադրական կապիտալում բաժնետոմսերի ձեռքբերմանը, որով նախատեսվում է ձեռք բերել թվով 405 հատ մետաղադրամների հաշվիչ մեքենաներ՝ ավտոբուսներում ուղեւորափոխադրումներն արդյունավետ կազմակերպելու նպատակով:

Համապատասխան որոշումն ընդունվել է հոկտեմբերի 26-ին Երեւանի ավագանու նիստին։

Սակայն, խնդիրը այստեղ այն չէ, որ 140 հազար է հատկացվում տվյալ մեքենաները գնելու համար, այլ այն, որ տվյալ մեքենաները շատ շուտով անպիտան են դառնալու, քանի որ անցում է կատարվելու տոմսերի քարտային համակարգի: Ավագանու նիստի ընթացքում այս հարցը նույնպես բարձրացվել է, սակայն, իշխանությունները չեն կարող բացատրել, թե տվյալ մեքենաները գնելուց հետո դրանք հետագայում ինչ նպատակի են ծառայելու: Եթե ծառայելու են՝ շատ լավ, եթե ոչ, ապա ստացվում է, որ Երևանի քաղաքապետարանը օրը ցերեկով 140 հազար դոլար է ջուրը գցում: Իսկ հետագայում այդ նույն քաղաքապետարանը հայտարարում է, որ բյուջեում գումար չկա և այդ պատճառով անհրաժեշտ  է դիցուք՝ տեղական տուրքերը կամ հարկերը բարձրացնել: Համաձայնեք, բյուջեն որևէ ճեղք չէր ունենա, եթե ահա այսպիսի անհիմն որոշումներ չկայացվեին: