Միթ Ռոմնին «Գազպրոմի» ի և «Յանդեկսի» բաժնետեր

ԱՄՆ-ի նախագահի թեկնածու հանրապետական Միթ Ռոմնիի ակտիվները ղեկավարող ֆոնդը 2011թ. ընթացքում գնել է «Գազպրոմ»-ի և «Յանդեկս»-ի ակցիաները: Այդ մասին տվյալներ են պահպանվել Ռոմնիի և նրա կնոջ հարկային հռչակագրում:

Փաստաթուղթը հրապարակվել էր դեռևս սեպտեմբերի 21-ին, սակայն ԶԼՄ-ների ուշադրության կենտրոնում է հայտնվել միայն այժմ: Համաձայն հռչակագրի՝ ֆոնդը ձեռք է բերել «Յանդեկս»-ի ակցիաները 2011թ. հունիսին և վաճառել օգոստոսին: «Գազպրոմ»-ի արժեթղթերը գնվել են օգոստոսին և վաճառվել սեպտեմբերին: Երկու դեպքում էլ նախագահի թեկնածուն վնասով է դուրս եկել այդ գործարքներից:

Բացի այդ՝ Ռոմնիի ակտիվների կառավարող ընկերությունը ներդրումներ է կատարել գերմանական Volkswagen և Adidas, ճապոնական Toyota, չինական CNOOC նավթային ընկերության և բրազիլական Itau բանկի ակցիաների մեջ: Հռչակագրում նշվում է, որ Ռոմնիի ակցիաները տրվել են «կույր վստահության», այլ խոսքերով ասած, նա չի կարող միջամտել դրանց տնօրինմանը, սակայն կարող է փոխել վստահության ֆոնդի կառավարչին:

Հռչակագրի համաձայն՝ Ռոմնիի և նրա կնոջ եկամուտը անցյալ տարի կազմել է 14 մլն դոլար: Նրանք վճարել են 1.9 մլն դոլար հարկ, ընդ որում, նրանց եկամտի շուրջ 30%-ը ծախսվել է բարեգործության վրա (4 մլն դոլար): Ռոմնիի ընդհանուր ունեցվածքը գնահատվում է 200 մլն դոլար։