Ղրղզստանի նախկին նախագահին մեղադրում են իր աշխատակազմի ղեկավարի սպանության մեջ

Դատարան է հանձնվել Ղրղզստանի նախկին նախագահ Կուրմանբեկ Բակիևի և նրա կրտսեր եղբոր նկատմամբ քրեական գործը. գրում է Вести-ն։

Նրանց մեղադրում են Մեդեթ Սադիրկուլովի սպանության մեջ, ով 2007-2008 թվականներին զբաղեցնում էր նախագահի աշխատակազմի ղեկավարի պաշտոնը։

Գարնանը Բիշքեքում դատական գործընթաց սկսվեց ՆԳՆ նախկին աշխատակիցների, սահմանային ծառայության աշխատակիցների նկատմամբ, որոնց մեղադրում էին 2009 թվականի մարտին Մեդեթ Սադիրկուլովի, ռազմավարական հետազոտությունների միջազգային ինստիտուտի նախկին տնօրեն Սերգեյ Սլեպչենկոյի և վարորդ կուբատ Սուլայմանովի սպանության մեջ։ Երեքն էլ գտնվել էին այրված մեքենայում, լեռներում, Բիշքեքից ոչ հեռու։

Պետանվտանգության ծառայության և ՆԳՆ՝ այս գործով մեղադրվող աշխատակւիցները հայտնել են, որ սպանության կազմակերպման գործում գլխավոր դերը կատարել է նախկին նախագահի կրտսեր եղբայր Ժանիբեկ Բակիևը։ Նրա նկատմամբ հայտարարվել է միջպետական և միջազգային որոնում։ Որոշ տվյալներով՝ նա գտնվում է Բելառուսում, սակայն այդ պետությունը հրաժարվել է նրան հանձնել Ղրղզստանին։