Կերպարանափոխված հանրապետականները ՔՊ-ով գալիս են իշխանության

«Քաղաքացիական պայմանագիր» կուսակցությունը հրապարակել է դեկտեմբերի 5-ին Շիրակի, Արմավիրի, Արարատի, Տավուշի, Լոռու, Վայոց ձորի և Արագածոտնի մարզերում կայանալիք ՏԻՄ ընտրություններում կուսակցության համամասնական ցուցակները գլխավորող անձանց անունները:

Ցանկը ուշագրավ է նրանով, որ առավել ուշադիր զննելու դեպքում` այն ոչնչով չի տարբերվում մի քանի տարի առաջվա ՀՀԿ նախընտրական ցանկերից: Հանրապետականների առատությունը ՔՊ-ի ցանկում մի կողմից, ինչ խոսք, զարմանալի է, մյուս կողից՝ արդեն ոչ:

Դիցուք՝ Շիրակի մարզի Արթիկ խոշորացված համայնքի ղեկավարի պաշտոնում «Քաղաքացիական պայմանագիր» կուսակցությունն առաջադրելու է Պեմզաշեն համայնքի ղեկավար Անանիկ Ոսկանյանի թեկնածությունը։ Վերջինս ԵԿՄ անդամ է, Մանվել Գրիգորյանի սանիկը։ Փաստորեն Մանվել Գրիգորյանին տուշոնկայի գողության մեջ մեղադրող և այդ մեղադրանքը մինչ օրս չապացուցած իշխանությունները չեն խորշում Գրիգորյանի սանիկի հետ նման բարձր մակարդակով համագործակցությունից:

Արագածոտնի մարզի Ապարան քաղաքի քաղաքապետի թեկնածու ՔՊ-ն առաջադրել է Էդգար Փարվանյանի թեկնածությունը։ Նա է գլխավորելու ՔՊ-ի ավագանու ցուցակը։ Փարվայանը Ապարանում հեղինակություն է համարվում, նա զովացուցիչ ըմպելիքների արտադրությմաբ զբաղվող «Ապարան Գրուպ» ընկերության տնօրենն է։ Վերջինս Սերժ Սարգսյանի կառավարման տարիներին անդամակցել է ՀՀԿ-ին:

Արագածոտնի մարզի Աշտարակ քաղաքի քաղաքապետի թեկնածու ՔՊ-ն առաջադրել է գործող քաղաքապետին՝ Թովմաս Շահվերդյանին։ Շահվերդյանը այդ պաշտոնին հասել է բացառապես ՀՀԿ-ի շնորհիվ, սակայն, հեղափոխությունից հետո անչափ արագ է կողմնորոշվել, թե որ ուղղությամբ են փչում քաղաքական քամիները և այժմ ՔՊ-ի սրտի թեկնածուն է:

Վայոց Ձորի Ջերմուկ խոշորացված համայնքի ղեկավարի ՔՊ-ի թեկնածուն էլ Վահագն Արսենյանն է։ Նա ՀՀԿ-ական նախկին պատգամավոր Աշոտ Արսենյանի որդին է։ ՔՊ-ի համար խոչընդոտ չհանդիսացավ անգամ այն հանգամանքը, որ Վահագն Արսենյանի դեմ հարուցված քրեական գործը ընդամենը ամիսներ առաջ է կարճվել, թե ինչու՝ հանրությանը, իհարկե, չեն տեղեկացրել:

ՔՊ-ն Արտաշատի շրջանում առաջադրել է Կառլեն Մկրտչյանի՝ կուսակցության տարածքային կառույցի ղեկավարի թեկնածությունը: Ուշագրավ է, որ գործարարն ընտրություններում աջակցում էր Ռոբերտ Քոչարյանին, ՀՓՇ միտինգներին մարդ էր ուղարկում, սակայն, հավանաբար, հիմա «խելոքացել» է:

Իջևանում ՔՊ թեկնածուն Արթուր Ճաղարյանն է: 2015-2021 թվականներին Արթուր Ճաղարյանն աշխատել է Իջևանի համայնքապետարանում՝ որպես համայնքի ղեկավարի տեղակալ։ 2021 թվականի ապրիլի 8-ին, ՀՀ վարչապետի որոշմամբ, նշանակվել է Իջևան համայնքի ղեկավարի պաշտոնակատար։

Ինչպես տեսնում ենք՝ որևէ խոչընդոտ չկա նախկին/ներկա իշխանությունների համագործակության մեջ, երբ այդ համագործակցությունը բխում է երկու կողմերի շահերից: Արդյունքում՝ նախկին «թալանչիները» սահուն վերակերպվում են ՔՊ-ական քաղաքապետերի և ավագանու անդամների թեկնածուների: