Նազելի Բաղդասարյանը «օկուպացնում» է Շիրակի մարզը

ՔՊ-ական պատգամավոր Նազելի Բաղդասարյանի վաղեմի երազանքը մոտ է իրականանալուն: Բանն այն է, որ վերջինս հրաժարվել է պատգամավորի մանդատից և, ամենայն հավանականությամբ, կնշանակվի Շիրակի մարզպետ` այս պաշտոնում փոխարինելով Գյումրիում ՏԻՄ ընտրությունները տապալած Հովհաննես Հարությունյանին:

Բաղդասարյանն անթաքույց կերպով ցանկանում է մարզն իրենով անել և դառնալ Շիրակի ստվերային ղեկավարը: Սկզբնական փուլում` մինչ ՏԻՄ ընտրությունները, նա ցանկանում էր այդ նպատակին հասնել հարազատ եղբորը Գյումրիի քաղաքապետ դարձնելով, հետո սակայն, եկան կոմպրոմիսի, որ ամեն դեպքում Բաղդասարյանի եղբայրը կհավակնի լավագույն դեպքում` փոխքաղաքապետի պաշտոնին: Միևնույն ժամանակ, Գյումրիում ՏԻՄ ընտրություններին ՔՊ ցուցակում ակնհայտ կերպով երևում էր Բաղդասարյանի ներկայությունը` ի դեմս իր ազգականների և ընկերների: Ցուցակի երրորդ համարը Բաղդասարյանի ընկերուհին էր՝ Գյումրու ինֆեկցիոնի տնօրեն Աստղիկ Բեյբությանը, վեցերորդը՝ օգնականն էր՝ Հարությունյան Քնարիկը:

Ի դեպ, ամիսներ առաջ մամուլը գրել էր, որ Կարեն Սարուխանյան-Նազելի Բաղդասարյան տանդեմը փորում է գործող մարզպետի ոտքի տակ: Դրան հաջորդեց հրապարակումը, որ Գյումրիում կայացած ընտրություններից հետո ՔՊ շտաբում թեժ է եղել, իսկ հիմնական կռվարարներն էին՝ Սարուխանյանը, Հարությունյանը և Բաղդասարյանը:

 Ինչպես երևում է, ՔՊ-ական պատգամավորին և ԱԻՆ փոխնախարարին հաջողվել է համոզել Նիկոլ Փաշինյանին, որ Շիրակում ՏԻՄ ընտրություններում պարտությունը գործող մարզպետի մեղքն է և արդյունքում Հարությունյանը հրաժարվեց անգամ ավագանու իր մանդատից և ակնհայտ է, որ շուտով կլքի իր պաշտոնը: Նազելի Բաղդասարյանն էլ հաջողությամբ կշարունակի Շիրակի մարզն օկուպացնելու իր ծրագիրը, որն սկսել էր դեռ հեղափոխությունից անմիջապես հետո;