Տված խոսքից «թռնելու» նուրբ արվեստը. Քերոբյանի նոր «խորամանկությունը»

Ապաշրջափակման արդյունքում Հայաստանի տնտեսությունը 30 տոկոսանոց աճ կգրանցի։ Այդ մասին ԱԺ տարածաշրջանային և եվրասիական ինտեգրման հարցերի ու ֆինանսավարկային և բյուջետային հարցերի մշտական հանձնաժողովների համատեղ նիստում 2022թ–ի բյուջեի նախագծի քննարկման ժամանակ հայտնել է ՀՀ էկոնոմիկայի նախարար Վահան Քերոբյանը։ «Կան Համաշխարհային բանկի մի քիչ հին հետազոտություններ այն մասին, որ շրջափակման վերացումը Հայաստանին 30 տոկոս տնտեսական աճ կբերի շատ կարճ ժամանակում»,– ասել է Քերոբյանը։

 

Ավելին, նա խոստացել է նման ցուցանիշ չարձանագրվելու դեպքում անձամբ հրաժարականի դիմում ներկայացնել վարչապետին: Սա առաջին դեպքը չէ, երբ էկոնոմիկայի նախարարը հանրությանը խոստանում է հրաժարական տալ՝ ինչ-ինչ արդյունքներ չգրանցելու դեպքում: Մի քանի ամիս առաջ նա հայտարարել էր, որ եթե տարվա ավարտին ՀՀ-ն չգրանցի երկնիշ տնտեսական աճ, ապա ինքը հրաժարականի դիմում կներկայացնի: ՀՀ -ն ոչ միայն չգրանցեց երկնիշ տնտեսական աճ, այլ մի բան էլ ունեցավ տնտեսական անկում, սակայն, Քերոբյանը, կարծես թե, մոռացել է իր տված խոստման մասին, և այժմ էլ իր հրաժարականը կապում է մի ցուցանիշի հետ, որի հիմքում չկա որևէ լուրջ հիմնավորում և որը, լավագույն դեպքում, իրեն զգացնել կտա տասնյակ տարիներ անց: Փաստորեն, Քերոբյանն այդքան ժամանակ նախարար մնալու հույսեր ունի...