Նազելի Բաղդասարյանի «հուժկու» ձեռքբերումները պատգամավորի պաշտոնում

 ԱԺ նախկին պատգամավոր, ներկայումս Շիրակի մարզպետ Նազելի Բաղդասարյանը պաշտոնը ստանձնելու կապակցությամբ մի գրառում էր արել, որում, մասնավորապես, նշել էր,  որ լինելով օրենսդիր մարմնի ներկայացուցիչ՝ նախորդող ժամանակահատվածում ձեռնամուխ է եղել շուրջ երկու տասնյակ օրենսդրական նախաձեռնությունների փոփոխության, որի հիմքում եղել են ինչպես իրավական բացերի շտկումը, այնպես էլ փոփոխություններ, որոնք էականորեն կբարելավեն մեր օրենսդրական համակարգը: Բաղդասարյանի կարծիքով՝ երկրի թիվ մեկ ամբիոնի մոտ իր քաղաքական խոսքը եղել է հաճախ կտրուկ, բայց մշտապես հիմնված փաստերի վրա, եղել է կշռադատված և անհարկի պիտակավորումներից և վիրավորանքներից զերծ: 

Ուշագրավ է, սակայն, որ Բաղդասարյանի հեղինակած օրենքի նախագծերի օգուտը և ազդեցությունը հպարտ քաղաքացիներն իրենց վրա այդպես էլ չեն զգացել: Մասնավորապես, նրա գրչին է պատկանում ՝ «Պետական պաշտոններ և պետական ծառայության պաշտոններ զբաղեցնող անձանց վարձատրության մասին» օրենքում լրացում կատարելու մասին օրենքի նախագիծը: Ասել է թե՝ տվյալ նախագիծը միտված էր պաշտոնյաների, ոչ թե հպարտ քաղաքացիների սոցիալական խնդիրները լուծելուն:

Բաղդասարյանը նաև հպարտանում է ԵԽԽՎ պատվիրակության կազմում իր ունեցած հաջողություններով: Բոլոր նրանք, ովքեր այս երեք տարիների ընթացքում հետևել են լրահոսին, տեղյակ են՝ ինչպիսի «ձեռքբերումներ» է գրանցել մեր պատվիրակությունը սույն հարթակում:

Հերթական անգամ հաջողություններով, մեղմ ասած, աչքի չընկնող ՔՊ-ականը պաշտոնի բարձրացում է ստանում, իսկ սա իր հերթին տեղիք է տալիս մտածելու, թե ի վերջո ինչ չափանիշով է Նիկոլ Փաշինյանը ընտրում այս կամ այն առանցքային պաշտոնների հարմար թեկնածուների՝ նվիրվածությա՞ն, թե՞ ի պաշտոնե ունեցած ձեռքբերումների: