Թաղապետից՝ պատգամավոր. ինչո՞վ է երեք տարում աչքի ընկել Միքայել Թումասյանը

Վերջին շրջանում զգալիորեն աճել են Երևանի թաղապետերի աշխատավարձերը, ինչը որևէ կերպ չի արտահայտվել վերջիններիս կողմից կատարվող աշխատանքների որակի վրա: Ավելին, Երևանի համայնքների ղեկավարները ընդհանրապես չեն հայտնվում մամուլի ուշադրության կենտրոնում, իսկ դա նշանակում է, որ վերջիններս, բառի բուն իմաստով, մատնված են պարապուրդի: Սակայն, դա էլ իր հերթին խոչընդոտ չի հանդիսանում, որպեսզի վերջիններս կարիերային աճ գրանցեն: Դիցուք՝ երեկ պատգամավորական մանդատ է վերցրել ՔՊ-ական թերևս ամենաերկարակյաց թաղապետը՝ Միքայել Թումասյանը, ով նաև համարվում է Նիկոլ Փաշինյանի մտերիմը: 

Թե ինչո՞վ է երեք տարվա մեջ աչքի ընկել վարչական շրջանի ղեկավարը՝ դժվար է ասել, չկան նույնիսկ աշխատանքի մասին հաշվետվություններ, որպեսզի հանրությունն էլ պատկերացում կազմի աշխատանքի այն տիտանական չափերի մասին, որոնք կատարվել են Դավթաշենում Թումասյանի ղեկավարման տարիներին: Փոխարենը` վերջինիս վերաբերյալ կան բավական ուշագրավ հրապարակումներ: Այսպես օրինակ՝ մամուլը գրել էր, որ  9.9 մլն դրամ է հատկացվել Դավթաշեն վարչական շրջանի ղեկավարի՝ Միքայել Թումասյանի համար ծառայողական ավտոմեքենա գնելու նպատակով: Խորհրդարանում փոխքաղաքապետ Հայկ Սարգսյանը այս անհրաժեշտությունը պարզաբանել էր հետեւյալ կերպ. «Թաղապետն իր անձնական ավտոմեքենան էր օգտագործում մինչ այժմ, որը վթարվել է, եւ հարմար ավտոմեքենա չեն գտել մինչեւ այսօր, որ տան պաշտոնյային»: 

ԶԼՄ-ները նաև արձանագրել էին, որ  Թումասյանը սկսել է շրջել սև գույնի Porsche Panamera մակնիշի մեքենայով, ֆիքսել էին նաև «գոլդ» համարանիշը՝ 01 MT 110։ Եթե հաշվի առնենք այս մեքենայի գինը, որ շուկայում մինչև 100 հազար դոլարի է հասնում, զուգահեռ անցկացնենք վարչական շրջանի ղեկավարի (թաղապետի) որոշում ընդունելուց զուրկ լիազորությունները և դրա դիմաց 275.000 դրամ մաքուր աշխատավարձը, չաշխատող ընտանիքը, կենցաղային հոգսերը, ապա շարքային թաղապետը հաստատ չէր կարող իրեն թույլ տալ նման ճոխություն։ Այդ դեպքում որտեղի՞ց և ինչի՞ հաշվին է վարչապետ Նիկոլ Փաշինյանի կուսակից երիտասարդ թաղապետն այսքան ճոխ մեքենա ձեռք բերել։ Լրագրողների այս հարցին ի պատասխան՝ Միքայել Թումասյանը պատմեց իր հարուստ աներոջ մասին (Պետական վերահսկողական ծառայության պետ Արգիշտի Քյարամյանի քեռու հայտնի օրինակով)։

Թումասյանը պարբերաբար խոստանում էր հանրությանը ներկայացնել իր աշխատանքի հաշվետվությունը, սակայն, ինչպես տեսնում ենք, հարմար պահի պարզապես տեղափոխվեց ավելի բարձր պաշտոնի, իսկ հաշվետվության մասին իր շատ ու շատ գործընկերների նման պարզապես մոռացավ: Իսկ գուցե հաշվետու լինելու ոչինչ էլ չկա՞....