Հայաստանը դո՞ւրս կգա ՀԱՊԿ-ից և ԵԱՏՄ-ից. Փաշինյանը փորձում է պահել իշխանությունը

ԱԺ ՔՊ խմբակցության մի շարք պատգամավորներ ադրբեջանական ագրեսիայի ֆոնին ամբիոնից հայտարարություններ են տարածում` ակնարկելով, որ Հայաստանը կարող է սպառել համբերության իր պաշարը և դուրս գալ ՀԱՊԿ-ից: ՔՊ-ական պատգամավորների կողմից այս ուղղորդված արշավի ֆոնին հայտարարություն է տարածել ՀՀ ԱԽ քարտուղարը` նշելով, որ Հայաստանը կոչով դիմում է Մոսկվային՝ 1997 թվականի երկկողմ պայմանագրի հիման վրա ՀՀ տարածքային ամբողջությունը ապահովելու նպատակով: Դժվար է ասել, թե ինչու կոչով, երբ կա համապատասխան ընթացակարգ, սակայն, թե ինչու 1997 թվականի պայմանագրի հիման վրա, այլ ոչ թե դիցուք՝ 2017-ի, դժվար չէ կռահել:

Նիկոլ Փաշինյանը փաստացի զրկում է Մոսկվային Հայաստանին օգնելու գործուն հնարավորությունից, քանի որ հասկանում է՝ 1997 թվականի պայմանագրով ռեալ մեխանիզմներ սահմանված չեն: Իսկ սա իր հերթին նշանակում է, որ Փաշինյանը խաղարկում է ՀԱՊԿ-ից և ԵԱՏՄ-ից դուրս գալու հերթական արարը: Մոսկվային պատերազմը հիմա ձեռնտու չէ, և Փաշինյանը դա քաջ գիտակցում է: Իսկ եթե Մոսկվան չի միջամտում, դա Փաշինյանին լեգիտիմ առիթ է տալիս ՀԱՊԿ կազմից դուրս գալու հայտ ներկայացնել: Ի դեպ՝ արդեն հայտնի է դարձել, որ Փաշինյանը Բայդենի հրավերով մեկնելու է ԱՄՆ: Իհարկե, այս ամենը Փաշինյանի կողմից արվում է նպատակային՝ մի կողմից Զանգեզուրի միջանցքը կհանձնվի արդբեջանցիներին, մյուս կողմից Հայաստանը վերջնականապես կբռնի Արևմուտքի կողմը և ինչպես ՔՊ-ական պատգամավորներն էին այսօր սպառնում՝ կգտնի նոր դաշնակիցներ: Սրանով Փաշինյանը լուծում է իր` իշխանության մնալու խնդիրը, իսկ թե ինչ գին կվճարի դրա դիմաց Հայաստանը՝ Փաշինյանին, կարծես թե, առանձնապես չի հուզում: