Ոստիկանությունն ունի նոր պաշտոնական կայք

Ասյօր Ոստիկանության կենտրոնական շենքում տեղի ունեցավ ՀՀ ոստիկանության ինտերնետային նոր կայք-էջի շնորհանդեսը:
Շնորհանդեսին ներկա էին ԵԱՀԿ երևանյան գրասենյակի ղեկավար, դեսպան Անդրեյ Սորոկինը, ՀՀ ոստիկանության պետ, գեներալ-լեյտենանտ Վլադիմիր Գասպարյանը, միջազգային և հասարակական կազմակերպությունների ներկայացուցիչներ:

ՀՀ Ոստիկանության հասարակայնության հետ կապերի և լրատվության վարչության պետ Աշոտ Ահարոնյանն իր խոսքում  նշեց, որ կայքի շնորհանդեսի օրը պատահական չէ ընտրված:

«Նախ նշեմ, որ կայքը գործարկելու օրը պատահական չէ ընտված, քանի որ տեղեկատվության ազատության միջազգային օրն է: Ոստիկանությունը նոր կայքով շարունակելու է հավատարիմ մնալ իր որդեգրած քաղաքականությանը, որն է՝ իր գործունեությունը դարձնել հրապարակային»,-ասաց Աշոտ Ահարոնյանը:

Վերջինիս խոսքերով՝ ոստիկանության կայքը գործում է շուրջ ութ տարի, փոփոխության է ենթարկվել միայն մեկ անգամ՝ 2010 թվականին, և երկու տարի հետո որոշում կայացվեց կայքը ևս մեկ անգամ փոփոխության ենթարկել: «Կային դժգոհություններ կայքի վերաբերյալ և բոլոր քննադատությունները հիմք դարձան, որ մենք փոփոխենք մեր պաշտոնական կայքը: Աջակցության համար դիմել ենք ԵԱՀԿ-ին ու թեև մի քանի ամիս առաջ ենք դիմել, բայց մեր գործընկերները պատրաստակամ եղան միանգամից մեզ օգնել: Կայքի ստեղծումը տևեց երեք ամիս և այսօր ունենք այն, ինչ ունենք»:

Աշոտ Ահարոնյանը նշեց նաև, որ Ոստիկանության պաշտոնական կայքը այցելուների քանակով առաջատար տեղերում է:

Աշոտ Ահարոնյանի խոսքից հետո Ոստիկանության լրատվության վարչության պետի տեղակալ Վարուժան Բալյանը ներկայացրեց Ոստիկանության նոր պաշտոնական կայքն իր ամբողջական տեսքով և նորություններով:

Նորություններից մեկն այն է, որ գործում է թեժ գիծ բաժինը, այստեղ զետեղված են այն հեռախոսահամարները, որոնք քաղաքացիներին ավելի շատ են պետք գալիս: Կայքի միջոցով յուրաքանչյուր քաղաքացի կարող է միանալ նաև համայնքի տեղամասային տեսուչին, նշված են բոլոր տեղամասային տեսուչների տվյալները:

Կայքը լինելու է եռալեզու: