Քանի դեռ հանցագործն իշխանության կողմն է, ոչինչ, որ հանցագործ է. Արամ Կարապետյան

Երեկ ՀՀ գլխավոր դատախազ Աղվան Հովսեփյանն Ազգային ժողով է ներկայացրել միջնորդագիր՝ ՀՀ ԱԺ պատգամավոր Վարդան Օսկանյանին ՀՀ կառավարությանն առընթեր ազգային անվտանգության ծառայության քննչական վարչության վարույթում քննվող քրեական գործով որպես մեղադրյալ ներգրավելու համաձայնություն տալու մասին: Այս առթիվ Lurer.com-ը զրուցեց «Նոր Ժամանակներ» կուսակցության նախագահ Արամ Կարապետյանի հետ, ով մասնավորապես նշեց.

«Յուրաքանչյուր քաղաքական գործչի նկատմամբ հետապնդում իր մեջ քաղաքական պատվեր լինելու տրամաբանություն ունի։ Սա աշխարհի բոլոր երկրներում բոլոր ժամանակների հարց է։ Ես կցանկանամ մինչև վերջ սպասել, թե ինչ մեղադրանք կառաջադրվի, որովհետև պետք է տեսնենք մեղադրանքի առաջադրումն  իրավական տեսանկյունից ինչքանով է պաշտպանված,  իսկապես այնտեղ քրեական գործի հիմքեր կա՞ն։ Դրանից հետո պարզ կդառնա՝ սա իսկապես հաշվեհարդար է, թե ինչ որ չափով քրեական գործ։ Պետք է ասեմ  նաև, որ Հայաստանում այս հարցը շատ հետաքրքիր է, մարդը քանի դեռ դեմ չի գնացել իշխանությանը, կարող է այնպես ստացվել, որ նրա նկատմամբ քրեական հետապնդում չլինի նույնիսկ, եթե քրեորեն պատժելի արարք է արել»։ 

Արամ Կարապետյանին նաև տարբեր տեղեկություններ են հասել, թե այդ մեղադրանքը կարող է կապված լինել նաև արտաքին գործերի նախարար եղած ժամանակ նախարարության խնդիրների հետ։

«Ինձ շատ հետաքրքրում է, թե Վարդան Օսկանյանին ինչ մեղադրանքներ են առաջադրվել,  դա միայն «փողերի լվացումն» է, հարկերից խուսափումը, թե այլ բան, որովհետև ինձ տարբեր տեղեկություններ են հասել»,- ասաց Արամ Կարապետյանը։ 

Վերջինս նկատում է նաև, որ դրանք երկու երեք տարվա գործեր են և հարց է առաջանում՝ ինչո՞ւ  հենց հիմա այդ ամեն հիշեցին և արեցին։ «Հայաստանի իշխանությունների պարագայում ամենացավալին այն է, որ հանցագործը քանի դեռ իշխանության կողմն է, ոչինչ, որ հանցագործ է, կարևորը «իշխանության հանցագործն է», հենց որ մարդն անցնում է քաղաքական այլ դաշտ, ասում են սա մեր հանցագործը չէ այլևս և  պետք է ձերբակալել։ Հանցագործը հանցագործ է, ի՞նչ տարբերություն՝ իշխանությանն է, ընդդիմությանը, թե՝ որևէ մեկինը»։